"Azərbaycan Respublikası Konstitusiyasının 30 illiyi (1995–2025)" yubiley medalı

"Azərbaycan Respublikası Konstitusiyasının 30 illiyi (1995–2025)" yubiley medalı Azərbaycan Respublikasının 2025-ci il 10 oktyabr tarixli 264-VIIQD nömrəli Qanunu ilə təsis edilmişdir.^[1]

Azərbaycan Respublikası Konstitusiyasının hazırlanmasına, təkmilləşdirilməsinə və təbliğinə, qanunvericilik və hüquq sisteminin inkişafına, Azərbaycan Respublikası Konstitusiyasının aliliyinin təmin edilməsinə, dövlət müstəqilliyinin möhkəmləndirilməsinə, Konstitusiya ilə təsbit olunmuş əsas insan və vətəndaş hüquq və azadlıqlarının müdafiəsinə, konstitusion ideya və prinsiplərin formalaşdırılması və inkişafına töhfələr vermiş, habelə Azərbaycan dövləti qarşısında xüsusi xidmətləri olan şəxslər təltif edilirlər.^[2]

Medala layiq görülən şəxslər Azərbaycan Respublikası Konstitusiya Məhkəməsinin sədri tərəfindən təltif edilirlər.^[3]

Yubiley medalı döşün sol tərəfinə, Azərbaycan Respublikasının digər orden və medalları olduqda onlardan sonra taxılır.^[2]

"Azərbaycan Respublikası Konstitusiyasının 30 illiyi (1995–2025)" yubiley medalının təsviri Azərbaycan Respublikasının 2025-ci il 10 oktyabr tarixli Qanunu ilə təsdiq edilmişdir.^[4]

Medalın ümumi təsviri

• "Azərbaycan Respublikası Konstitusiyasının 30 illiyi (1995–2025)" Azərbaycan Respublikasının yubiley medalı bürüncdən tökülmüş və qızıl suyuna çəkilmiş, diametri 40 mm olan səkkizguşəli ulduz formalı lövhədən ibarətdir.

Medalın ön tərəfi

• Medalın ön tərəfində hər bir guşəsi qabarıq olan səkkizguşəli ulduzun üzərində xarici və daxili çevrələrlə konturlanmış dairəvi lövhə yerləşdirilmişdir.
• Xarici və daxili konturların arasında yuxarı qövs boyunca "Azərbaycan Respublikasının Konstitusiyası" sözləri, aşağı qövs boyunca sol tərəfdə "1995", sağ tərəfdə "2025" rəqəmləri və rəqəmlərin arasında mərkəzdə səkkizguşəli ulduz, habelə kompozisiyanı tamamlayan xətlər təsvir olunmuşdur.
• Daxili çevrənin içərisində Azərbaycan Respublikası Dövlət Gerbinin təsviri, ondan aşağıda "30" rəqəmləri və "il" sözü və Azərbaycan Respublikasının Dövlət Bayrağını təsvir edən simvollar həkk edilmişdir.
• Bütün yazılar, rəqəmlər və simvollar qızılı rəngdədir, qabarıqdır.

Medalın arxa tərəfi

• Medalın arxa tərəfi hamar səthlidir, aşağı hissəsində medalın seriyası və nömrəsi göstərilir.

Medalın elementləri

• Medal paltarın yaxasına bərkidilmək üçün elementi olan, 50 mm × 37 mm ölçülü beşbucaqlı xara lentə iki halqa və ilgək vasitəsilə birləşdirilir.
• Xara lentin yuxarı hissəsinə üzərində ikiqatlı lent və səkkizguşəli ulduz təsvir olunmuş 40 mm × 5,5 mm ölçülü lövhə bərkidilmişdir.
• Xara lentin mərkəzində 11 mm enində tünd yaşıl rəngli, mərkəzdən sol və sağ kənarlara doğru ardıcıl olaraq 2,5 mm enində qızılı rəngli, 2 mm enində göy rəngli, 3,5 mm enində qızılı rəngli, 3,5 mm enində tünd yaşıl rəngli, 1,5 mm enində qızılı rəngli şaquli zolaqlar təsvir olunmuşdur.
• Medala paltarın yaxasına bərkidilmək üçün elementi olan, eyni xara lentdən üz çəkilmiş 37 mm × 10 mm ölçülü qəlib əlavə edilir.