"Michelin" ulduzu (fr. Guide Michelin) və ya Michelin Red Guide — Fransız təkər istehsalçısı Michelin tərəfindən otel mətbəxlərinə və restoranlara verilən prestijli mükafatdır. Müəssisələr müxtəlif meyarlar əsasında qiymətləndirilir. Michelin ulduzu qazanmaq və ya ulduzlarının sayını artırmaq restorana beynəlxalq tanınma və üstünlük qazandırır.
1900-cü ildə Fransada 3000-dən az avtomobil var idi. Avtomobil şinlərinə olan tələbatı artırmaq məqsədilə, Michelin şinləri istehsalçıları, Edouard və André Michelin qardaşları Fransız motoristlər üçün "Guide Michelin" adlı bələdçi nəşr etdilər. İlk pulsuz nəşr 35.000 nüsxə ilə yayılmışdı və sürücülərə xəritələr, təkərlərin təmiri və dəyişdirilməsi təlimatları, avtomobil mexanikası siyahıları, otellər və Fransa üzrə yanacaqdoldurma məntəqələri kimi faydalı məlumatlar təqdim edirdi.
Birinci Dünya müharibəsi illərində Guide Michelin bələdçinin nəşri dayandırıldı. Restoran bölməsinin artan populyarlığını nəzərə alaraq, qardaşlar restoranlara baş çəkmək və onları qiymətləndirmək üçün anonim müfəttişlərdən ibarət bir komanda yaratdılar.
Michelin 1926-cı ildən etibarən restoranlara ulduzlarla mükafat verməyə başladı. Başlanğıcda yalnız bir ulduz verilirdi. Lakin, 1931-ci ildə sıfır, bir, iki və üç ulduzdan ibarət iyerarxiya tətbiq olundu. 1936-cı ildə isə, restoranların qiymətləndirilməsində istifadə olunan reytinq meyarları dərc olundu:
1 ulduz: "Öz kateqoriyasında çox yaxşı restoran" (Une très bonne table dans sa catégorie)
2 ulduz: "Əla yemək, gəlməyə dəyər" (Table excellente, mérite un détour)
3 ulduz: "Müstəsna mətbəx, buranı xüsusi ziyarət etməyə dəyər" (Une des meilleures tables, vaut le voyage).
2023-cü ilin fevralında İsrailin Turizm Nazirliyi "Michelin ulduzunu" öz ölkəsinə gətirmək üçün 1,5 milyon avro ödəmə təklifini elan etdi.