"Tullantıdan sənətə" muzeyi (ing. "From Waste to Art" Museum) – Azərbaycanın Bakı şəhərində, Qala qəsəbəsində yerləşən muzey. Tullantıların təkrar emalı və istifadəsi ilə hazırlanmış incəsənət əsərlərinə həsr olunmuşdur.
| "Tullantıdan sənətə" muzeyi | |
|---|---|
 | |
 | |
| Açılış tarixi | 14 iyun 2015 |
| Ölkə | |
| Yerləşir | Qala |
| 40°26′21″ şm. e. 50°10′10″ ş. u. | |
"Tullantıdan sənətə" sərgisi ilk dəfə 2010-cu ildə Heydər Əliyev Fondunun təşəbbüsü ilə "Təmiz Qala" adlı pilot layihə çərçivəsində təşkil olunmuşdur.[1] "Tullantıdan sənətə" muzeyi Heydər Əliyev Fondunun təşəbbüsü və "Təmiz Şəhər" Açıq Səhmdar Cəmiyyətinin dəstəyi ilə "Qala" Dövlət Tarix-Etnoqrafiya Qoruğunun ərazisində yaradılmışdır.[2] Muzey 14 iyun 2015-ci ildə Heydər Əliyev Fondunun vitse-prezidenti Leyla Əliyevanın iştirakı ilə açılmışdır.[3]
Muzey eksponatlarının böyük hissəsini 2012-ci ildən etibarən Azərbaycanda baş tutan "Tullantıdan Sənətə" Beynəlxalq sərgisi çərçivəsində yaradılan əsərlər təşkil edir. Hazırda muzeydə tullantılardan istifadə edilərək hazırlanmış 180-ə qədər müxtəlif sənət əsəri sərgilənir. Bu sənət əsərləri, plastik su qabları, polietilen qablaşdırmaları, uşaq arabası, oyuncaqlar, avtomobil hissələri, tennis topları, siqaret kötükləri kimi tullantılardan hazırlanmışdır.[2]
Muzeydə sərgilənən sənət əsərlərinə dəmir parçalarından hazırlanmış "Simurq quşu", taxta tullantılarından yaradılmış atlar, plastik qaşıq, çəngəl və bıçaqlardan istifadə edilərək yaradılmış balıq obrazı,[2] 1, 3, 5 qəpiklik sikkələrdən yaranan balıq fiqurları, avtomobil disklərindən və müxtəlif hissələrindən hazırlanmış tar daxildir.[4] Bu sənət əsərləri yerli sənətkarla yanaşı, dünyanın 46-dan çox ölkəsindən olan sənətkarlar tərəfindən hazırlanmışdır.[2] Muzeydə azərbaycanlı sənətkarlardan Nəzrin Musayevanın polietilen paketlərdən, Aytən Abdullayevanın kitab və jurnal sətrlərindən, Cavid Yəhyayevin təkər və müxtəlif tullantılardan hazırladıqları sənət əsərləri yer alır. Muzeydə Tess Feliksin plastik əşyalardan hazırladığı Qara Qarayev portreti sərgilənir. Selçuk Yılmaz tərəfindən zibilxanalardan yığdığı köhnə metallarla hazırladığı və muzeydə sərgilənən şir heykəli əvvəlcə gömrükdən buraxılmamış, "sənət əsəri" olduğu bildirilmişdi.[5]
2019-cu ildə Nəsimi ili münasibətilə muzeydə İmadəddin Nəsimi üçün xüsusi guşə yaradılmış, Nəsiminin şeirlərindən ibarət və güzgü tullantılarından ibarət "Nəsimi ağacı" quraşdırılmışdır. Güzgü qırıqlarından Nəsiminin portreti də yaradılmışdır. Onun günahsız şəkildə edamı "Femida" obrazı ilə əks etdirilmişdir. Buradakı təsbehin dənəcikləri qəzetlərin dairəvi formada bükülərək rənglənməsindən alınmışdır.[4]
- ↑ "Bakıda tullantılardan hazırlanmış əsərlərin muzeyi açılıb". Teleqraf. 17 iyun 2015. 18 sentyabr 2025 tarixində arxivləşdirilib. İstifadə tarixi: 18 sentyabr 2025.
- 1 2 3 4 "Muzey". Təmiz Şəhər. Archived from the original on 18 sentyabr 2025. İstifadə tarixi: 18 sentyabr 2025.
- ↑ ""Tullantıdan sənətə" muzeyi". Heydər Əliyev Fondu. 14 oktyabr 2024. 14 oktyabr 2024 tarixində arxivləşdirilib. İstifadə tarixi: 18 sentyabr 2025.
- 1 2 "Zibillikdəki tullantılar sənət əsərinə necə çevrilir – Qeyri-adi muzeydən reportaj". İctimai Xəbər. 24 yanvar 2020. 18 sentyabr 2025 tarixində arxivləşdirilib. İstifadə tarixi: 18 sentyabr 2025.
- ↑ "Görün, zibildən nələr hazırladılar - Azərbaycanda + Fotolar + Video". Qafqazinfo. 17 dekabr 2015. 18 sentyabr 2025 tarixində arxivləşdirilib. İstifadə tarixi: 18 sentyabr 2025.