Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edinƏbu Abdillah Şəmsəddin Məhəmməd ibn Muflih ibn Məhəmməd əl-Məqdisi ər-Rəmini (ərəb. ابن مفلح; 1308, Fələstin – 1362, Dəməşq) — Hənbəli hüquqçusu və mühəddis. O, hənbəli məzhəbinin inkişafında böyük rolu olmuş İbn Muflih nəslinin ilk nümayəndəsidir.
| İbn Muflih | |
|---|---|
| ərəb. ابن مفلح | |
 | |
| Doğum tarixi | 1308 |
| Doğum yeri | |
| Vəfat tarixi | 1362 (53–54 yaşında) |
| Vəfat yeri | |
| Elm sahələri | fiqh, Hənbəli məzhəbi |
Beytül-Məqdisdə dünyaya gəldiyi güman edilir. O, İsa əl-Mötəimdən hədis, İbn Müsəlləmdən fiqh və qrammatika, Qazı əz-Züridən üsul, Cəmaləddin əl-Mərdavidən fiqh, Həccar, Mizzi və Zəhəbidən hədis, rical və tarix, İbn əl-Füveyrədən isə ərəb dili və ədəbiyyatı öyrənmişdir. Lakin onun fikirlərinin formalaşmasında müəllimi İbn Teymiyyənin mühüm rolu olmuşdur. Təhlisini başa vurduqdan sonra əsər yazmağa və tələbə yetişdirməyə başlamışdır. O, Dəməşqdəki Sahibiyyə, Şeyx Əbu Ömər, Salamiyyə, Sədriyyə və Darül-hədisil-alimə kimi mədrəsələrdə dərs demişdir. Bir müddət qayınatası Cəmaləddin əl-Mərdaviyə naiblik etmişdir. O, hicri 763-cü (1362) ildə Dəməşqdə vəfat etmişdir.[1] Dərin biliyi və əxlaqı ilə diqqətləri özünə cəlb edən İbn Muflih, İbn Teymiyyə, İbn Qeyyim əl-Cövziyyə, Zəhəbi və Təqiyyəddin əs-Sübki tərəffindən təriflənmişdir.[2][3][4]
İbn Muflihin qələmə aldığı əsərlər bunlardır:
- Kitabül-Füru. Əsər Hənbəli məzhəbinin orta həcmli fundamental füru mətinlərindən biridir. Asan oxunub əzbərlənməsi üçün sübutlara yer verilməmişdir. Əsərin müxtəlif nəşrləri vardır (I–III, Qahirə 1921; I–VI, Qahirə 1922; I–VI, Beyrut 1985).
- əl-Ədəbüş-şəriyyə. Əsər İslam əxlaqı ilə bağlı qələmə alınmışdır.
- ən-Nükət vəl-fəvaidüs-səniyyə əla müşkilil-Muhərrər li-Məcdiddin İbn Teymiyyə. İbn Teymiyyənin "əl-Muhərrər fil-fiqh əla məzhəbil-İmam Əhməd ibn Hənbəl" adlı əsərinin şərhidir (I–II, Qahirə 1950; Riyad 1984).
- Üsulül-fiqh. Əsər bir çox Hənbəli üsul kitablarında olmayan məsələləri özündə ehtiva edir.
Mənbələrdə onun "Şərhul-Muqni", "Haşiyə aləl-Muqni" və "Haşiyə aləl-Müntəqa" adlı əsərlərin müəllifi olduğu da qeyd edilib.[1]