Şükürbəyli-Cəbrayıl-Hadrut avtomobil yolu

Şükürbəyli-Cəbrayıl-Hadrut yeni avtomobil yolunun təməli 2021-ci il 15 mart tarixində Azərbaycan Respublikasının Prezidenti İlham Əliyev və birinci xanım Mehriban Əliyevanın işğaldan azad edilmiş Füzuli və Xocavənd rayonlarına səfəri zamanı qoyulub. Layihənin icrasına təməlqoyma mərasimindən dərhal sonra start verilib.^[1]

2021-ci ildə yolboyu torpaq işləri, qazma və dolğu, yolun genişləndirilməsi və 21,5 metr enində yeni torpaq yatağının inşası, mina və partlamamış hərbi sursatlardan təmizləmə işləri paralel şəkildə həyata keçirilib.^[1]

2021-ci il 9 oktyabr tarixində Prezident İlham Əliyev Hadrut-Cəbrayıl-Şükürbəyli, Tuğ-Hadrut və Füzuli-Hadrut yollarında aparılan tikinti işləri ilə tanış olub.^[2]

Şükürbəyli-Cəbrayıl-Hadrut avtomobil yolunun 14,2 kilometrlik Şükürbəyli-Cəbrayıl hissəsi 2022-ci il 19 oktyabr tarixində Prezident İlham Əliyevin iştirakı ilə istifadəyə verilib.^[3]

2023-cü il 5 may tarixində Prezident İlham Əliyev yolun əlavə 8,2 kilometrlik hissəsinin açılışında iştirak edib.^[4]

Şükürbəyli-Cəbrayıl-Hadrut avtomobil yolu I texniki dərəcəyə uyğun dörd hərəkət zolaqlı magistral yol olaraq inşa edilmişdir.^[5] Yolun marşrutu işğaldan azad edilmiş Xocavənd, Füzuli və Cəbrayıl rayonlarının ərazisindən keçir, Hadrut qəsəbəsi və Cəbrayıl şəhəri də daxil olmaqla həmin rayonların təxminən 20-yə yaxın yaşayış məntəqəsini birləşdirir.^[4] Yolun hərəkət hissəsinin eni 14-14,5 metr, torpaq yatağının eni isə 21,5 metrdir.^[1]

Layihə çərçivəsində yol boyunca çoxsaylı hidrotexniki və mühafizə qurğuları inşa olunmuşdur. Burada çoxsaylı dairəvi suötürücü borular, 9 düzbucaqlı su keçidi, 49 ehtiyat boru, yolun ətraf mühitə və faunaya təsirini azaltmaq üçün 7 yolaltı heyvan keçidi, həmçinin zəruri sahələrdə beton və daş istinad divarları üzərində tikinti işləri aparılıb.^[6]

Yol boyunca ümumilikdə 6 avtomobil körpüsü tikilib. Körpülərdən biri Hacıqabul-Mincivan-Zəngəzur dəhlizi magistral avtomobil yolu ilə kəsişmə nöqtəsində layihələndirilərək magistrala rahat giriş-çıxışı təmin edir.^[1]

Uzunluğu 42 kilometr olan köhnə yolun 2,3 kilometr qısaldılaraq 39,7 kilometrlik yeni marşrutla əvəz olunması layihənin əsas xüsusiyyətlərindən biri kimi qeyd edilib.^[3][4]