Əhləm Müstəqanami (ərəb. أحلام مستغانمي) — Əlcəzair yazıçısı və şairi. O, "Ərəb roman müəllifləri arasında ən məşhuru"[3] adlandırılır. Əhləm Tunisdə siyasi və inqilabçı xadim Məhəmməd Şərifin ailəsində anadan olub, əsərləri ingilis dilinə tərcümə edilən ilk Əlcəzair yazıçısı olub. O, dörd roman və altı şeir kitabı nəşr etdirmişdir və ən çox tanınan əsəri 1993-cü ildə nəşr olunan "Bədənin hafizəsi" (Zakirat el Jassad) adlı romanıdır. 2007 və 2008-ci illərdə o, "Arabian Business" jurnalının sıralamasına görə müvafiq olaraq 96-cı və 58-ci sırada yerləşmişdir. UNESCO Sülh Artisti adına malikdir (2016).
| Əhləm Müstəqanami | |
|---|---|
 | |
| Doğum tarixi | 13 aprel 1959[1] (66 yaş) və ya 13 aprel 1953[2] (72 yaş) |
| Doğum yeri | |
| Təhsili | |
| Fəaliyyəti | yazıçı, şair, romançı |
 Vikianbarda əlaqəli mediafayllar | |
Əhləm Müstəqanaminin ailəsi əslən Əlcəzairin Konstantin şəhərindəndir. Onun atası 1945-ci ildəki Setif və Gelma qətliamından sonra həbs edilmiş Əlcəzair millətçisi olub. 1947-ci ildə azad edilən atası, Əlcəzair müstəqillik qazandıqdan sonra, Əhməd Bin Bellanın hökumətində mühüm vəzifələr tutmuşdur. 1965-ci ildəki Boumedin çevrilişi nəticəsində Bin Bella hakimiyyətdən salındıqdan sonra, atası ruhi sarsıntı yaşamış və Əlcəzair şəhərinə göndərilmişdir. Onun ruhi sarsıntıları və Əlcəzairdəki davam edən siyasi qarışıqlıqlar onu küskün, çaşqın və ümidsiz etmişdir.
Atasının olmaması ilə Əhləm Müstəqanami böyük bacı olaraq ailəsinə baxmışdır və radio aparıcısı kimi işləyib. 17 yaşında Əlcəzairdə "Pıçıldama" (Hammassat) adlı şeirli günlük proqramı ilə məşhurlaşmışdır. 1973-cü ildə ərəb dilində şeir nəşr edən ilk qadın yazıçı olaraq "Günün Limanı" (Ala Marfa al Ayam) adlı şeir kitabını çap etdirmişdir. 1976-cı ildə isə "Yalnızlıq Anında Yazı" (Al Kitaba fi Lahdat Ouray) adlı ikinci şeir kitabını nəşr etdirmişdir. Əhləm Müstəqanami Əlcəzairdə ərəb dilində yazıb oxuyan ilk nəsil arasında yer alır, çünki fransızlar tərəfindən bir əsrdən artıq ərəb dilinin istifadəsi qadağan olunmuşdu.
Əhləm Müstəqanami Parisdə on beş il ərzində müxtəlif jurnallar üçün yazmışdır. Bu illər ərzində yazdığı romanın parçaları da daxil olmaqla şeir üzərindən nəsrə keçmiş və "Sevgi itirildikdə şeir yazılır, vətən itirildikdə isə roman yazılır" demişdir. O, Əlcəzairi heç vaxt ağlından çıxarmadığını bildirmişdir: "Bəzi ölkələrdə yaşayırıq, bəziləri isə bizdə yaşayır". 1993-cü ildə Əhləm Müstəqanami Livanda yerləşərək ilk romanı "Bədənin hafizəsi"bi (Zakirat el Jassad) nəşr etdirdi. "Dar Al Adab" nəşriyyatının redaktoru, romanı siyasi cəsarətlə yazılmış poeziya xarakterində bir sevgi hekayəsi olaraq təsvir etmiş və onun ərəb dünyasında böyük bir uğur qazanacağını proqnozlaşdırmışdır. Müasir ərəb şairi Nəcib Məhfuz yazıçının ünvanına yazdığı məktubunda "Bu roman mənə başgicəlləndirici bir hiss verdi" demişdir.
"Bədənin hafizəsi" (Zakirat el Jassad) əsəri ilə Müstəqanami 1998-ci ildə "Naguib Mahfouz" Mükafatını qazandı. Bu mükafat Fransız "Goncourt" mükafatına bərabərdir və ərəb dilindəki ən yüksək ədəbiyyat mükafatı sayılır.
Hazırda Əhləm Müstəqanami həyat yoldaşı və üç uşağı ilə birlikdə Beyrutda yaşayır.
- ↑ Freebase Data Dumps. Google.
- ↑ https://web.archive.org/web/20131106001453/http://www.highbeam.com/doc/1G2-2830800217.html.
- ↑ Zahia Smail Salhi, 'Mustaghanmi, Ahlam (1953-)', Biographical Encyclopedia of the Modern Middle East and North Africa Arxiv surəti 6 sentyabr 2017 tarixindən Wayback Machine saytında