Əhməd Musa İbrahim Metani (ərəb. أحمد موسى إبراهيم ميتاني; d. 3 dekabr 1980) — Fələstinli siyasətçi, diplomat və yazıçı. 16 aprel 2025-ci ildən etibarən Fələstin Dövlətinin Azərbaycan Respublikası üzrə səfiri vəzifəsini icra edir.[1][2] Bundan əvvəl Malayziya, İndoneziya və Filippində müxtəlif diplomatik vəzifələrdə çalışmış, konsulluq, mədəniyyət, ticarət və təhsil sahələrinə dair missiyalara rəhbərlik etmişdir.
| Əhməd Musa İbrahim Metani | |
|---|---|
| أحمد موسى إبراهيم ميتاني | |
| Digər adı | Əhməd Metani |
| Doğum tarixi | |
| Doğum yeri | İmmatın, Nablus, Fələstin |
| Vətəndaşlığı | Fələstin |
| Milliyyəti | fələstinli |
| İxtisası | diplomat, siyasətçi, yazıçı |
| Təhsili | An-Najah Milli Universiteti; Malayziya Elm Universiteti (magistr, PhD) |
| Fəaliyyəti | Diplomatiya, siyasi fəaliyyət, ədəbi yaradıcılıq |
| Fəaliyyət illəri | 2000–indiki dövr |
| Elmi dərəcəsi | Elektron ticarət üzrə fəlsəfə doktoru (PhD) |
| Tanınır | Fələstinin Azərbaycan Respublikasındakı səfiri (2025–) |
Əhməd Metani 3 dekabr 1980-ci ildə Fələstinin Nablus şəhəri yaxınlığındakı İmmatın kəndində anadan olmuşdur. O, Nablusdakı Kral Talal Məktəbində oxumuş, ibtidai və orta təhsilini doğma şəhərində tamamlamışdır. Metani bakalavr dərəcəsini An-Najah Milli Universitetində əldə etmişdir. Daha sonra Malayziya Elm Universitetində Elektron Ticarət üzrə magistr və fəlsəfə doktoru (PhD) dərəcələri almışdır.
Gənclik illərində Metani Fələstində professional voleybolçu kimi çıxış etmiş, daha sonra diplomatik fəaliyyətə başlamışdır.
Əhməd Metani evlidir. Lin, Xalid və Lelas adlı üç övladı var.
Metani 2000-ci illərin əvvəllərində Fələstin diplomatik xidmətinə daxil olmuş və sonrakı illərdə bir neçə ölkədə müxtəlif vəzifələrdə çalışmışdır:
- Malayziya (2005–2017): 12 il ərzində Fələstin səfirliyində çalışmış, konsulluq, mədəniyyət və ticarət işlərinə cavabdeh olmuşdur.[3] Tayland, Bruney və Maldiv kimi qonşu ölkələr üzrə fəaliyyətə nəzarət etmiş, mədəni sərgilər təşkil etmiş, QHT və universitetlərlə əməkdaşlıq qurmuşdur.[4]
- İndoneziya (2017–2025): 8 il Cakartada səfir müavini olmuş, Fələstin–İndoneziya əlaqələrinin gücləndirilməsinə, humanitar və təhsil əməkdaşlığına töhfə vermişdir.[5][6][7]
- Filippin (qısa müddət): Fələstin səfirliyinin müvəqqəti işlər vəkili (Chargé d’Affaires) kimi fəaliyyət göstərmişdir.
- Azərbaycan (2025–indiki dövr): 16 aprel 2025-ci ildə Fələstin Dövlətinin Azərbaycan Respublikasındakı səfiri kimi etimadnaməsini təqdim etmişdir.[8] Onun fəaliyyəti siyasi, iqtisadi, mədəni və humanitar əməkdaşlığın genişləndirilməsinə, həmçinin BMT və İƏT kimi beynəlxalq təşkilatlarda Fələstin mövqeyinin təmsil olunmasına yönəlib.[9]
Metani beynəlxalq elmi jurnallarda tədqiqatlar dərc etdirmişdir. Onun “Social Psychology Theories Be Applied to Achieve Strategic Political Objective” adlı araşdırması siyasi strategiyada psixologiyanın tətbiqi məsələlərini təhlil edir.
Əhməd Metani həmçinin yazıçıdır. Ərəb dilində qələmə aldığı “الأستاذ نعمان: رسالة الحياة” (''Professor Nuaman: Həyatın Mesajı'') romanı intellektual dözümlülük, müxtəlifliyin qəbul edilməsi və birgəyaşayış mövzularına həsr olunmuşdur və ərəb oxucuları arasında geniş maraq doğurmuşdur.[10]
- ↑ Azvision. "Azerbaijani FM meets incoming Palestinian Ambassador". https://azvision.az (ingilis). 2025. İstifadə tarixi: 20 noyabr 2025.
- ↑ Rehimov, Ruslan. "علييف: أذربيجان ستواصل دعم المطالب العادلة للشعب الفلسطيني". Anadolu Ajansı. 15 iyun 2025.
- ↑ MFA Malaysia, 2014. səh. 117
- ↑ MFA Malaysia, 2013. səh. 94
- ↑ antaranews.com. "Palestina tetap jadi prioritas kebijakan luar negeri Indonesia". Antara News (indoneziya). 29 noyabr 2023. İstifadə tarixi: 20 noyabr 2025.
- ↑ Agency, ANTARA News. "Kedubes Palestina larang warga serahkan bantuan donasi di luar kedutaan - ANTARA News Aceh". Antara News. İstifadə tarixi: 22 noyabr 2025.
- ↑ "Palestine Thanks Jokowi Government for Support During Gaza Conflicts". Jakarta Globe. İstifadə tarixi: 22 noyabr 2025.
- ↑ "İlham Əliyev Fələstinin ölkəmizdə yeni təyin olunmuş səfirinin etimadnaməsini qəbul edib » Azərbaycan Prezidentinin Rəsmi internet səhifəsi". president.az (az.). İstifadə tarixi: 20 noyabr 2025.
- ↑ "Azerbaijani FM meets Palestinian ambassador". Apa.az (ingilis). İstifadə tarixi: 20 noyabr 2025.
- ↑ احمد ميتاني, مروان العلان. الاستاذ نعمان : رسالة الحياة. 2013.
- Diplomatic and Consular List (PDF). Kuala Lumpur: Ministry of Foreign Affairs, Malaysia. 2014. İstifadə tarixi: 22 noyabr 2025.
- Ministry of Foreign Affairs. Diplomatic & Consular List (PDF). Bandar Seri Begawan. 2013. İstifadə tarixi: 22 noyabr 2025.