Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edinBu səhifədə iş davam etməkdədir. |
Əli Abbas bəy Hacı Niftalı oğlu Əlibəyov (1870, Quba – 1937) — Quba ictimai-siyasi həyatının tanınmış nümayəndəsi, 1918–1920-ci illərdə Quba şəhər başçısı olmuşdur.
| Əli Abbas bəy Əlibəyov | |
|---|---|
| 1918 – 1920 | |
| Şəxsi məlumatlar | |
| Doğum tarixi | 1870 |
| Doğum yeri | |
| Vəfat tarixi | 1937 (66–67 yaşında) |
| Vəfat səbəbi | güllələnmə[d] |
| Fəaliyyəti | ictimai xadim, siyasətçi |
.svg){kind=small}
Əli Abbas bəy Əlibəyov 1870-ci ildə Qubada bəy ailəsində anadan olmuşdur. Qubada ikiillik şəhər məktəbini bitirmişdir. Çar Rusiyası dövründə Quba qəzasının məhkəmə orqanlarında kiçik vəzifələrdə çalışmış, bir müddət Bakıda 2-ci Barışdırıcı bölmənin katibinin köməkçisi olmuşdur.[1]
1918-ci ilin əvvəllərində Qubaya qayıtmış və həmin il Quba şəhər başçısı seçilmişdir. 1920-ci ilin aprel ayının sonunadək — Azərbaycanda sovet hakimiyyəti qurulana qədər — bu vəzifədə fəaliyyət göstərmişdir.[1]
1918-ci ilin aprel–may aylarında Qubada baş vermiş hadisələr zamanı şəhəri tərk etməmişdir. Əhalinin vəziyyətini yüngülləşdirmək məqsədilə erməni hərbi dəstələrinin başçısı olan Amazasp ilə danışıqlar aparmışdır. Eyni zamanda, şəhərin müdafiəsi üçün silahlı müqavimətin təşkilində fəal iştirak etmişdir. 1918-ci il Quba hadisələrini araşdıran Fövqəladə Təhqiqat Komissiyasının işində yaxından iştirak etmiş, özü də ətraflı ifadə vermişdir.[2]
1920-ci ilin aprelində Azərbaycanda sovet hakimiyyəti qurulduqdan sonra həbs edilmiş, bütün mülkiyyəti müsadirə olunmuşdur. Lakin qısa müddət sonra azadlığa buraxılmışdır.[2]
1929-cu ildə “keçmiş qolçomaq” kimi seçki hüququndan məhrum edilmiş, lakin bir ay yarımdan sonra hüquqlarının bərpasına nail olmuşdur. Quba qəzasında vəkillik fəaliyyəti göstərmiş, həbs olunana qədər Azərbaycan Sovet Sosialist Respublikasının Müdafiəçilər Kollegiyasının üzvü olmuşdur. O, həmçinin Azərbaycan SSR Ədliyyə Xalq Komissarlığı sistemində aparılan “təmizləmə” proseslərindən keçmişdir.[2]
6 avqust 1937-ci ildə Azərbaycan SSR Daxili İşlər Xalq Komissarlığının (DİXK) Quba Rayon Şöbəsi tərəfindən həbs edilmişdir. Ona qarşı antisovet təbliğat aparmaq ittihamı irəli sürülmüşdür. Özünü təqsirli bilməmişdir. 26 avqust 1937-ci ildə Azərbaycan SSR DİXK-nın Xüsusi Üçlüyünün qərarı ilə ən yüksək cəzaya — güllələnməyə məhkum edilmişdir. 1937-ci ildə edam edilmişdir. Sonralar ölümündən sonra bəraət almışdır.[2]
- 1 2 Rüstəmova-Tohidi, 2013. səh. 246
- 1 2 3 4 Rüstəmova-Tohidi, 2013. səh. 247
- Rüstəmova-Tohidi, Solmaz. Quba. Aprel-May 1918-ci il. Müsəlman qırğınları sənədlərdə (PDF) (az.). Bakı: Heydər Əliyev Fondu və Heydər Əliyev Mərkəzinin dəstəyi ilə. 2013. 316.