Akunin-şoki (悪人正機, Akunin shōki?, hərf. "günahkarlar — xilasa layiq olanlardır") — buddizmin Codo-şinşu məktəbinin əsas postulatlarından biri. Bu konsepsiya XIII əsrin ortalarında Yaponiya rahibi Şinran tərəfindən irəli sürülmüşdür. Bi dünyanın cinayətkarları və günahkarları budda Amidanın dünyanı xilas edəcəyinə dair verdiyi vəd vasitəsilə xilasa nail olacaq əsas varlıqlar hesab olunmuşdur.[1]
Təmiz torpaq təlimində belə bir inam mövcud olmuşdur ki, bu dünyanın iztirablarına və nəfsani istəklərinə bağlı olan günahkarlar maariflənməyə, buddist cənnətinə daxil olmağa öz səyləri ilə yox, budda Amidanın vəd etdiyi qüvvə vasitəsilə nail ola bilərlər. Yəni, günahkar xilasını yaxşı əməllər və asketik təcrübələr sayəsində yox, budda Amidaya olan iman və ona yönəlmiş davamlı dualar vasitəsilə əldə edəcəkdir.[1]
Amidanın qüdrətinə mütləq iman prinsipindən çıxış edən Şinran bu anlayışı daha da inkişaf etdirmişdir. Onun təliminə görə, budda Amida insanları xilas etmək vədini məhz cinayətkarların və mənəvi cəhətdən azğın insanların xilasına nail olmaq üçün vermişdir. Beləliklə, xilasanın əsas obyekti məhz günahkarlar olmuşdur. Şinran bu fikri belə ifadə etmişdir: "Əgər dindar insanlar Təmiz torpaq cənnətində yenidən doğulurlarsa, deməli, günahkarlar buna daha artıq layiqdirlər". Şinranın bu konsepsiyası orta əsrlər Yaponiyasının dini dünyasında geniş əks-səda doğurmuşdur.[1]