1920-ci il noyabrın 13-də Azərbaycan SSR İnqilab Komitəsinin sədri Nəriman Nərimanovun imzaladığı qərarla təsis edilmiş Bakı Politexnik İnstitutunun nəzdində 5 fakültə: neft sənayesi; elektromexaniki; mühəndis-tikinti; kənd təsərrüfatı və iqtisadiyyat fakültələri yaradılmışdır. Kənd təsərrüfatı fakültəsinin yaradılması ilə Azərbaycanda ilk dəfə ali kənd təsərrüfatı mütəxəssislərinin hazırlığına başlanılmışdır.

1929-cu ilədək fəaliyyət göstərmiş kənd təsərrüfatı fakültəsində tədris prosesini təmin etmək üçün o dövrlərdə Cənubi Qafqaza sürgün edilmiş bir qrup rus və digər əcnəbi alimlər cəlb edilmiş, 1924-cü ildə mütəxəssis hazırlığının birinci buraxılışı olmuşdur. Həmin dövrdə ölkəyə çox sayda kənd təsərrüfatı mütəxəssisi tələb olunduğundan kənd təsərrüfatı institutunun yaradılması zərurəti yaranmışdı.

Azərbaycan SSR Xalq Komissarları Sovetinin 1929-cu il 15 may tarixli qərarı ilə Bakıda Azərbaycan Kənd Təsərrüfatı İnstitutu yaradılmış və bu İnstitut 1931-ci ildə Gəncəyə köçürülmüşdür. Buradakı Zaqafqaziya Pambıqçılıq İnstitutu, Azərbaycan Zoobaytar İnstitutu və Tiflisdəki Hidromeliorasiya İnstitutu Azərbaycan Kənd Təsərrüfatı İnstitutu (AKTİ) tərkibinə birləşdirildi.

1950-ci ildə SSRİ Ali və Orta İxtisas Təhsili Nazirliyinin əmri ilə İnstitutun 30 illik yubileyi keçirilidi.

SSRİ Ali Soveti Rəyasət Heyətinin 1979-cu il 16 may tarixli Fərmanı ilə yüksəkixtisaslı mütəxəssis hazırlığında və kənd təsərrüfatı elminin inkişafında xidmətlərinə görə AKTİ "Şərəf nişanı" ordeni ilə təltif olunmuşdur. 1980-ci il dekabrın 16-da Heydər Əliyev Gəncəyə gələrək həmin ordeni Sovetlər İttifaqının rəhbərliyi adından kollektivə təqdim etmişdi.

Yarandığı dövrdən indiyədək Azərbaycan Dövlət Aqrar Universiteti müxtəlif xalqlardan olan 70 minə yaxın yüksəkixtisaslı mütəxəssis hazırlamışdır.

Azərbaycan Kənd Təsərrüfatı İnstitutu Azərbaycan Respublikası Prezidentinin Sərəncamı ilə 1991-ci ilin iyun ayından Azərbaycan Kənd Təsərrüfatı Akademiyası, Nazirlər Kabinetinin 2009-cu il 4 aprel tarixli 53 nömrəli qərarı ilə Azərbaycan Dövlət Aqrar Universiteti adlanır.

Azərbaycan Respublikası Prezidentinin 2000-ci il 13 iyun tarixli 349 nömrəli Fərmanı ilə universitet özünüidarəetmə prinsipi əsasında fəaliyyət göstərən dövlət ali təhsil müəssisəsi kimi təsdiq edilmişdir.

Universitet sonuncu dəfə 2011-ci il iyulun 19-da "Dövlət qeydiyyatı haqqında şəhadətnamə" ilə Azərbaycan Respublikasının Ədliyyə Nazirliyində qeydə alınmışdır.^[1]

17 fevral 2016-cı ildə Prezident İlham Əliyev Gəncədə Azərbaycan Dövlət Aqrar Universitetinin tələbə yataqxanasının açılışında iştirak edib. Prezident İlham Əliyev Azərbaycan Dövlət Aqrar Universitetinin tələbə yataqxanasının rəmzi açılışını bildirən lenti kəsib.^[2]

Kompleks dörd korpusu yeddimərtəbəli, bir korpusu isə altımərtəbəli binalardan ibarətdir. Əsas korpusun foyesində Ulu Öndər Heydər Əliyevin və Prezident İlham Əliyevin təhsilin inkişafına göstərdikləri qayğını, həmçinin Gəncəyə səfərlərini əks etdirən fotolardan ibarət guşə yaradılıb.^[2]

Binada qeydiyyat şöbəsi, zəngin kitabxana, stomatoloji kabinet, müayinə otağı, fotoatelye fəaliyyət göstərir. Binalarda akt və fitnes zalları, ticarət, iaşə və məişət xidməti obyektləri də var. Yataqxanadakı 257 otağın 251-i ikinəfərlik, altısı isə üçnəfərlikdir. Bütün mərtəbələrdə istirahət guşəsi və mətbəx var. Dam örtüyünün 2000 kvadratmetr sahəsi yataqxanada yaşayanların gəzintisi üçün nəzərdə tutulub. Yataqxananın elektrik enerjisi ilə təminatı üçün 1000 kilovoltluq güc transformatoru, isti və soyuq su ilə təminatı üçün qazanxana quraşdırılıb, su və yanğın hovuzları inşa edilib. ^[2]

Yataqxana istiqamətində Ozan və İsmət Qayıbov küçələrində abadlıq-quruculuq işləri aparılıb, asfalt salınıb və işıqlanma ilə təchiz edilib. Yolboyu hasarlar Gəncəyə xas memarlıq üslubunda kərpiclə üzlənib. ^[2]

10 noyabr 2017-ci ildə Prezident İlham Əliyev Gəncədə Azərbaycan Dövlət Aqrar Universitetinin tələbələri üçün yeni inşa edilmiş 514 yerlik yataqxana kompleksinin açılışında iştirak edib. Dövlətimizin başçısı yataqxana kompleksinin rəmzi açılışını bildirən lenti kəsib.^[3]

Bu təhsil ocağının 520 yerlik yeni tələbə yataqxanası 2016-cı ildə Prezident İlham Əliyevin iştirakı ilə istifadəyə verilib. 2015-ci ildə 514 yerlik daha bir yataqxana kompleksinin tikintisinə başlanıb və burada inşaat işləri 2017-ci ilin oktyabrında tam başa çatdırılıb. Ümumi ərazisi 13 640 kvadratmetr olan kompleks dördü 7 mərtəbəli və biri 6 mərtəbəli olmaqla 5 korpusdan ibarətdir. ^[3]

Kompleksdəki 257 otağın hamısı zəruri mebel və inventarla təchiz edilib. Hər mərtəbədə istirahət guşələri və mətbəx yaradılıb. Burada qeydiyyat şöbəsi, 120 nəfərlik akt və fitnes zalları, kafe, məişət və ticarət xidməti obyektləri, kitabxana, müayinə otağı və stomatoloji kabinet, valideynlərlə görüş otağı yaradılıb. Yataqxananın su, elektrik, istilik və rabitə xətləri ilə təmin edilməsi üçün fərdi qazanxana, hovuz, nasosxana və transformator yarımstansiyası inşa olunub. Kompleksin ətrafında geniş abadlıq-quruculuq işləri aparılıb, tələbələrin asudə vaxtlarının səmərəli keçirilməsi üçün hərtərəfli imkan yaradılıb.^[3]

2020-ci ildə Azərbaycan Respublikasının Prezidenti İlham Əliyev və birinci xanım Mehriban Əliyeva iyunun 24-də Gəncəyə səfərləri çərçivəsində Azərbaycan Dövlət Aqrar Universitetinin yeni tədris korpusunun açılışında iştirak ediblər.^[4]

Dövlətimizin başçısı və birinci xanım yeni tədris korpusunda yaradılan şəraitlə tanış olublar.^[4]

Diqqətə çatdırılıb ki, ölkədə ərzaq probleminin həllində önəmli rola malik olan kənd təsərrüfatının elmi əsaslarla inkişafında həmişə mühüm rolu olmuş bu ali təhsil müəssisəsi son illər tamamilə yenidən qurulur. Azərbaycan Prezidentinin 2018-ci il 22 yanvar tarixli Sərəncamına əsasən, dövlət əsaslı vəsait qoyuluşu - investisiya xərcləri hesabına tikilmiş yeni tədris korpusunda müasir təfəkkürlü kadrların hazırlanması, eləcə də elmi tədqiqatların səmərəli aparılması üçün hər cür şərait yaradılıb. Professor-müəllim heyətinin və tələbələrin ixtiyarına ən yeni əyani vasitələr və avadanlıqla təchiz olunmuş auditoriyalar və laboratoriyalar verilib. ^[4]

Binada bütün zəruri infrastruktur qurulub. İnzibati xidmət və digər yardımçı otaqlar yaradılıb. Yeni tədris korpusunda ümumilikdə 3 min tələbə iki növbədə təhsil alacaq.^[4]

Bildirilib ki, yeni tədris korpusunda aqronomluq, zootexniklik istiqaməti, ictimai elmlər və multikulturalizm kafedraları, interaktiv təlim-tədris otaqları fəaliyyət göstərəcək. Bu korpusun istifadəyə verilməsi bir də ona görə əlamətdardır ki, burada əlavə 93 nəfər üçün yeni iş yeri açılacaq.^[4]

2001-ci ilin aprel ayında tədris prosesində aparılan islahatlara, Avropa Şurasının tələblərinə uyğun təhsil proqramlarına və planlarına və digər yüksək göstəricilərə görə AKTA (indiki ADAU) Fransa Respublikasının ən qədim tarixli (200 il) Sənayeyə Yardım Assosiasiyasının "Qızıl medalı" ilə təltif olunmuşdur.^[5]

Hazırda dünyanın 20-dən çox ölkəsində (Türkiyə, İtaliya, ABŞ, MDB, İspaniya, Polşa, Almaniya, ÇXR, Malaziya və s.) yerləşən ali təhsil müəssisələri ilə əlaqələr qurulmuş, əməkdaşlıqlar genişləndirilmiş, tələbə-müəllim mübadiləsi, beynəlxalq konfranslar həyata keçirilmişdir. ^[6]

Son dövrlərdə ADAU-nun İnnovasiyalar mərkəzi 0-dan qurulmuş, maddi-texniki bazazsı gücləndirilmiş, Hakantonlarda iştirak intensivləşmişdir. Nəticə etibarilə İnnovasiya Mərkəzi Global Innovation Institute (GINI) tərəfindən Akkreditə Olunmuş Biznes İnkubator (ABI) statusu alaraq rəsmi beynəlxalq sertifikatla təltif edilmişdir.

Beynəlxalq rəqabət qabiliyyəti artırılması məqsədilə ADAU müxtəlif reytinq qiymətləndirmə sistemlərində yer almışdır. Misal üçün,

1.     Dünya Universitetlərin beynəlxalq reytinq üzrə dərəcələrini müəyyən edən digər bir nüfuzlu qurum Times Higher Education ”Impact Rankings” sistemidir ki, Azərbaycan Dövlət Aqrar Universiteti (ADAU) ilk dəfə müvafiq reytinq qiymətləndirilməsində yer almasına baxmayaraq dünya üzrə 1001-1500 diapazonunda yer alaraq ölkə üzrə 6-cı, region universitetləri arasında isə 1-ci və Dayanıqlı İnkişaf Məqsədləri 2 üzrə (aclığa son) isə Azərbaycan universitetləri arasında ilk sırada qərarlaşıb.

2.     Azərbaycan Dövlət Aqrar Universiteti (ADAU) “UI GreenMetric 2025” reytinqində infrastruktur və maddi texniki baza üzrə 1000 xal yığaraq ölkə birincisi olub. ADAU 105 ölkədən 1745 universitet arasında 4520 xal alaraq 1174-cü ölkə üzrə isə 19 ali təhsil müəssisəsi arasından 13-cü yerdə qərarlaşıb.

3.     Bundan başqa 15 ali təhsil müəssisəsinin yer aldığı RUR beynəlxalq reytinq agentliyinin (Round University Ranking) 2025-ci il üzrə nəticələri nəticələrə əsasən ADAU dünya universitetləri reytinqinə görə 1148-ci (ölkə üzrə 11-ci), beynəlmiləlləşmə göstəricisinə görə dünya üzrə 752 (ölkə üzrə 2-ci) tədrisə görə 961-ci (ölkə üzrə 7-ci), tədqiqata görə 1207-ci (ölkə üzrə 13-cü)  yerdə qərarlaşıb.

4.     Universitet "Webometrics" (https://www.webometrics.info/) beynəlxalq reytinq sistemində ölkə üzrə 10-cu yeri tutmuşdur.^[7]

2017-ci ildə "Kənd Təsərrüfatının Rəqabət Qabiliyyətinin Gücləndirilməsi" layihəsi çərçivəsində Azərbaycan Dövlət Aqrar Universitetinin nəzdində müasir tipli ferma kompleksi tikilib Kompleks 20 baş mal-qara və 4 baş at saxlamaq üçün 2 fermadan, müasir sağım aparatlarından, yememalı aqreqatlarından, üzvi gübrə istehsalı üçün peyinin ilkin təmizlənməsi avadanlıqlarından ibarətdir.

• adau.edu.az — rəsmi saytı

1. ↑ E-Mail, info@adau edu az. "AZƏRBAYCAN DÖVLƏT AQRAR UNİVERSİTETİ". AZƏRBAYCAN DÖVLƏT AQRAR UNİVERSİTETİ (az.). İstifadə tarixi: 9 yanvar 2026.
2. ↑ ^{1 2 3 4} "İlham Əliyev Azərbaycan Dövlət Aqrar Universitetinin yeni tədris korpusunun açılışında iştirak edib » Azərbaycan Prezidentinin Rəsmi internet səhifəsi". president.az (az.). İstifadə tarixi: 9 yanvar 2026.
3. ↑ ^{1 2 3} "İlham Əliyev Azərbaycan Dövlət Aqrar Universitetinin yeni inşa olunan yataqxana kompleksinin açılışını edib » Azərbaycan Prezidentinin Rəsmi internet səhifəsi". president.az (az.). İstifadə tarixi: 9 yanvar 2026.
4. ↑ ^{1 2 3 4 5} "İlham Əliyev Azərbaycan Dövlət Aqrar Universitetinin yeni tədris korpusunun açılışında iştirak edib » Azərbaycan Prezidentinin Rəsmi internet səhifəsi". president.az (az.). İstifadə tarixi: 9 yanvar 2026.
5. ↑ E-Mail, info@adau edu az. "AZƏRBAYCAN DÖVLƏT AQRAR UNİVERSİTETİ". AZƏRBAYCAN DÖVLƏT AQRAR UNİVERSİTETİ (az.). İstifadə tarixi: 9 yanvar 2026.
6. ↑ E-Mail, info@adau edu az. "AZƏRBAYCAN DÖVLƏT AQRAR UNİVERSİTETİ". AZƏRBAYCAN DÖVLƏT AQRAR UNİVERSİTETİ (az.). İstifadə tarixi: 9 yanvar 2026.
7. ↑ E-Mail, info@adau edu az. "AZƏRBAYCAN DÖVLƏT AQRAR UNİVERSİTETİ". AZƏRBAYCAN DÖVLƏT AQRAR UNİVERSİTETİ (az.). İstifadə tarixi: 9 yanvar 2026.