Butun axtardiqlarinizi tapmaq ucun buraya: DAXIL OLUN
  Mp4 Mp3 Axtar Yukle
  Video Axtar Yukle
  Shekil Axtar Yukle
  Informasiya Melumat Axtar
  Hazir Inshalar Toplusu
  AZERI CHAT + Tanishliq
  Saglamliq Tibbi Melumat
  Whatsapp Plus Yukle(Yeni)

  • Ana səhifə
  • Təsadüfi
  • Yaxınlıqdakılar
  • Daxil ol
  • Nizamlamalar
İndi ianə et Əgər Vikipediya sizin üçün faydalıdırsa, bu gün ianə edin.

Azərbaycan dövlətçiliyi

  • Məqalə
  • Müzakirə

Azərbaycan dövlətçiliyi və ya Azərbaycan dövlətçilik ənənələri — azərbaycanlıların və Azərbaycan kimliyini qəbul edənlərin dövlətçiliyi.

Mündəricat

  • 1 Tarixi-mədəni arxa plan
    • 1.1 Azərbaycanda mövcud olmuş dövlətlərin idarəetmə sistemi
    • 1.2 Azərbaycanlıların etnik qrup və millət kimi formalaşması
    • 1.3 Digər xalqların dövlətçiliyində iştirak
  • 2 Dövlətçilik tarixi
    • 2.1 AXC və Araz Türk Cümhuriyyəti
    • 2.2 Azərbaycan SSR və Naxçıvan MSSR
    • 2.3 Azərbaycan Respublikası və Naxçıvan MR
  • 3 Azərbaycan dövlətçiliyinin təbliği və tətbiqi
  • 4 İstinadlar
  • 5 Ədəbiyyat

Tarixi-mədəni arxa plan

Əsas məqalə: Azərbaycan tarixi

Azərbaycanda mövcud olmuş dövlətlərin idarəetmə sistemi

 
Divanxana Qriqori Qaqarinin təsvirində

Şirvanşahlar dövlətində Şirvanın vəziri — Şirvanşahın iltifatı ilə olsa da, dövlətin tam səlahiyyətli hakimi idi. Vəzirlərin hakimiyyəti, ilk növbədə, məmur təbəqəsinin nümayəndələri üçün bəxşiş mənbəyi idi. Əhalidən vergi yığmaq icazəsini (daman) vəzir verirdi. Bakı qalasındakı Cümə məscidi minarəsinin bünövrə daşındakı farsca kitabəyə görə Şirvanda, ehtimal ki, XI–XII əsrlərdə Şamaxıda, XIII–XIV əsrlərdə isə Bakıda vəzirlər divanı (divan əl-vüzəra) mövcud olmuşdur.[1] Sultan Məhəmməd Olcaytunun (1304–1316) yarlığının mətnindən ibarət olan bu kitabədə Bakıdakı divan xatırlanır.[2][3]

Quba xanlığında irsi idarəçilik, yəni monarxiya rejimi mövcud idi. Monarxiyanın başında qeyri-məhdud qanunverici, məhkəmə və icra hakimiyyətinə malik xan dayanırdı. Hakimiyyət atadan böyük oğula keçirdi. Xan hakimiyyəti həm icra formasında, həm də feodal hüququnun yardımı ilə məhkəmə formasında həyata keçirilirdi. Hüquq qeyri-rəsmi səciyyə daşıyırdı. Onun mənbəyi şəriət, ilk növbədə Quran idi. Hüququn digər, daha az vacib olmayan mənbəyi yerli adətlər idi. Xanın istədiyi şəxslərə torpaq, yaxud torpaqdan alınan gəliri bağışlamaq hüququ vardı.[4] Xanın yanında "Divanxana" və yaxud "Xan şurası" mövcud idi. Divanxana məşvərətçi orqan idi. Burada mühüm dövlət məsələləri: hərb və sülh vergilərin təyin olunması və toplanması, itaət göstərməyən bəylərə divan tutulması və onların əmlakının müsadirə olunması, mühüm cinayət işləri və digər dövlət əhəmiyyətli məsələlər nəzərdən keçirilirdi. Divanxanada ən yüksək vəzifələr vəzir, divanbəyi, qalabəyi, xəzinəağası, qoşunnavis, fərrasbaşı idi.[5]

Qarabağ xanlığını tam müstəqil hakimiyyətə malik olan "xan" idarə edirdi.[6] Qarabağ xanlığında "divan" yaxud "divanxana" fəaliyyət göstərirdi.[7] Divanxanalara qeyri-məhdud hüquqa malik olan xanlar başda olmaqla yüksəkvəzifəli şəxslər və xanın köməkçiləri rəhbərlik edirdilər. Qarabağ xanlığında "vəzir" divanxanada mühüm rol oynayırdı. Vəzir adətən xanın ən sədaqətli və inanılmış adamlarından təyin edilirdi. Vəzir həm savadlı, həm də geniş dünyagörüşünə malik olmalı idi. Xanlıq divanxanasında yüksək vəzifə daşıyanlardan biri də "divanbəyi" idi. Bu rütbəni müəyyən ruhanilər icra edirdilər və divanbəyilər həm də "qazı" adlandırılırdılar.[8]

Azərbaycanlıların etnik qrup və millət kimi formalaşması

Əsas məqalə: Azərbaycan kimliyi
 
Qarabağ xanı Pənahəli xan

XI–XIII əsrlərdə Səlcuqlar və Elxanilər dövründə oğuz tayfalarının Şərqi Zaqafqaziya və İran Azərbaycanına gəlişi ilə Azərbaycan xalqı formalaşmağa başlamış və bu proses XV əsrin sonlarına qədər davam etmişdir.[9][10]

İran mədəniyyəti və tarixini öyrənən İranika Ensiklopediyasına görə, Azərbaycan türkləri Səfəvilər dövlətinin qurucuları idi.[11] Səfəvi imperiyasında Azərbaycan dili hakimiyyətin, sarayın, qızılbaş hərbi təşkilatının və dini liderlərin dili, dövləti idarə edən sülalənin ana dili idi.[12]

XVIII əsrdə Əfşar dövlətinin parçalanmasından sonra Azərbaycan xanlıqları dövrü yarıməsrlik Azərbaycan müstəqilliyi dövrü (Əfşar, Zənd və Qacarlardan asılılığın olmaması və ya qismi asılılığın olması) olmuşdur.[13] Bu xanlıqları idarə edənlər türk mənşəli sülalələr idi.[14][15]

Tiflisdə yaşayan müsəlman ziyalıları arasında 1879-cu ildən başlayaraq "Azərbaycan dili" dil adı yayılmış, onlar bu dildə danışanları "azərbaycanlı" adlandırmışdır. "Azərbaycanlı" adının tətbiqində birinci səbəb istifadə edilən müsəlman kimliyinin düzgün hesab edilməməsi idi. İkinci səbəb isə ziyalıların fikrinə görə, azərbaycanlıların Volqa və Krım tatarlarından və Osmanlı türklərindən fərqli bir mədəniyyət, adət-ənənə və dilə malik olması idi.[16][17]

Digər xalqların dövlətçiliyində iştirak

Əsas məqalə: Azərbaycan təsiri § Dövlətçilik, milliyyətçilik və ordu
 
Molla Şəmsəddin Əhməd Qarabaği, Seyyid Loğman Urməvi və Alimin əmrindəki nəqqaş və xəttatlar məclisi[18]

Azərbaycanlı-türkmənlər həm İran fars dili və mədəniyyətində, həm də dil və mənşə baxımından bağlı olduqları Osmanlı türk mədəniyyətində dominant olduqları üçün iki mədəniyyət arasında elçi rolunu oynamış, xüsusilə Osmanlı ali saray mədəniyyətinin yaranmasına rəhbərlik etmişdir.[19] Osmanlı vəziri Çandarlı Əli Paşa klassik İslam qanunlarını, saray yaşayış ədəbini, bürokratiya üsullarını, qulam sistemini, maliyyə metodlarını, azərbaycanlı-iranlı bürokratlarının köməyi ilə tətbiq edərək Osmanlının dövlət idarəsində və saray həyatında islahatlar həyata keçirmişdi.[20] Osmanlı hökmdarları Orta Asiya və Azərbaycanda türk və fars dillərini bilən münşi, şair və alimləri öz paytaxtına çəkmək üçün fədakarlığa hazır idi.[21] Səfəvi şahı I İsmayıl dövründə (h.i. 1501–1524) isə ölkədən qaçan Ağqoyunlu bürokratları Osmanlı dövlətinə sığınmışdı.[22] Osmanlının Səfəvilər imperiyasındakı zəfərləri nəticəsində türk və azərbaycanlı şəxsi heyət Osmanlının hərbi elitasına daxil olmuşdur.[23]

Dövlətçilik tarixi

Əsas məqalələr: Azərbaycan tarixi və Azərbaycan etnik və milli kimliyi

AXC və Araz Türk Cümhuriyyəti

Əsas məqalələr: Azərbaycan Xalq Cümhuriyyəti və Araz Türk Cümhuriyyəti
 
Azərbaycan Xalq Cümhuriyyəti Parlamentinin açılışı. 7 dekabr 1918-ci il
 
Azərbaycan Xalq Cümhuriyyəti hökumətinin iclası

1918-ci ilin may ayının 28-də Məhəmməd Əmin Rəsulzadənin də daxil olduğu bir qrup azərbaycanlı ziyalı Azərbaycan Xalq Cümhuriyyətinin yarandığını elan edərək, Rusiyanın bir əsr davam edən müstəmləkəçiliyinə son qoymuşdur. Bununla da Azərbaycanın həm dövlət, həm də millət kimi başlanğıcı qoyulmuşdur (azərbaycanlıların XV əsrin sonlarında etnik qrup olaraq formalaşması ilə qarışdırılmamalıdır[24][25]).[26]

Müstəqil dövlətin mühüm atributlarından biri olan dövlət dili məsələsi yenicə yaranmış Azərbaycan Xalq Cümhuriyyəti Hökumətinin diqqət mərkəzində idi. Cümhuriyyət Hökuməti 1918-ci il 27 iyun tarixli qərarı ilə o zaman "türk dili" adlanan Azərbaycan dilini dövlət dili elan etmişdir.[27] Həmin qərar Gülüstan və Türkmənçay müqavilələri ilə Azərbaycanın ikiyə bölünməsindən sonra ana dilinin dövlət dili kimi işlədilməsinə aid ilk sənəddir.[27]

Azərbaycan Xalq Cümhuriyyəti Parlamentinin ilk təsis iclası 1918-ci ilin dekabr ayının 7-də Bakıdakı Tağıyev qız məktəbində keçirilmişdir.[28] Azərbaycan parlamentinin qanunvericilik və mərkəzi dövlət orqanlarını formalaşdırmaq, onların səlahiyyətini müəyyən etmək funksiyasından başqa bu və ya digər orqanın hesabatını dinləyib, onlar haqqında müvafiq qərar qəbul etmək, eləcə də ali dövlət nəzarətini həyata keçirmək funksiyaları var idi.[28] Parlament iclaslarının gündəliyindən xeyli hissəsi bu məsələlərə həsr edilmiş və bu barədə xüsusi qərarlar qəbul olunmuşdu.[28]

Azərbaycan Cümhuriyyətinin fəaliyyəti dövründə ölkənin idarəçiliyi ilə bağlı bütün məsələlər Böyük Nazirlər Şurasının iclaslarında kollegial şəkildə müzakirə və həll olunur, müvafiq qərarlar qəbul edilirdi. Böyük Nazirlər Şurasında ölkənin idarə olunması ilə bağlı bütün məsələlərə — dövlət quruculuğu, iqtisadiyyat, sənaye, kənd təsərrüfatı, maliyyə, ümumiyyətlə, bütün təsərrüfat sahələri üzrə işlərin təşkilinə, elmin, təhsilin, mədəniyyətin və s. yenidən qurulmasına baxılırdı. Ölkənin xarici siyasəti, onun müdafiəsi və s. məsələlər məhz Böyük Nazirlər Şurasının iclaslarında geniş müzakirə edilir və müvafiq qərarlar qəbul olunurdu.[29]

Azərbaycan SSR və Naxçıvan MSSR

Əsas məqalələr: Azərbaycan SSR və Naxçıvan Muxtar Sovet Sosialist Respublikası
 
Azərbaycan və rus dillərində "Bakı proletariatının 10 illik mübarizəsi (1917–1927)" yazılı plakatı. Pilləkənlərin üzərində "1920" rəqəmi, aşağıda "AzSSR" yazısı olan Qızıl Ordu əsgəri və gerb, altında isə "28/IV" tarixi yazılmışdır.

1937–1995-ci illərdə Azərbaycan Sovet Sosialist Respublikasında dövlət hakimiyyətinin ali və yeganə qanunverici orqanı Azərbaycan Ali Soveti idi.[30] Azərbaycan SSR Nazirlər Soveti 1946-cı il martın 28-də Azərbaycan SSR Ali Soveti Rəyasət Heyətinin fərmanı ilə yaradılmışdır. Bu dövrədək orqan Azərbaycan SSR Xalq Komissarları Soveti (1920–1946-cı illərdə mövcud olmuş qurum) adlanmışdır.[31] Azərbaycan SSR Nazirlər Soveti Azərbaycan SSR Ali Sovetinin hər çağırışının birinci sessiyasında təşkil edilirdi. Nazirlər Sovetinin tərkibinə Nazirlər Sovetinin sədri, onun birinci müavini, müavinləri, Azərbaycan SSR nazirləri, dövlət komitələrinin sədrləri, Azərbaycan SSR Konstitusiyasının 48-ci maddəsində göstərilmiş digər mərkəzi idarələrin rəhbərləri, Naxçıvan MSSR Nazirlər Sovetinin sədri (vəzifəsinə görə) daxil edilirdi. Azərbaycan SSR Nazirlər Soveti Azərbaycan SSR Ali Soveti, onun sessiyaları arasındakı dövrdə isə Ali Sovetin Rəyasət Heyəti qarşısında məsul olur və hesabat verirdi.[31]

Sovet dövründə Azərbaycanın sovet ordusu tərəfindən işğal edildiyi 28 aprel tarixi bayram günü kimi qeyd edilmişdir.[32] 1991-ci ilin 26 aprelində Bakı Ali Partiya Məktəbində "Azərbaycanda Sovet hakimiyyətinin qurulması: milli dövlətçilik və sosial tərəqqinin dialektikası" adlı elmi-nəzəri konfrans keçirilmişdir. Konfransın açılışında filoloq, tarix elmləri namizədi R. Q. Ağayev qeyd etmişdir ki, bu konfrans 28 aprel gününün yeni elmi baxışla öyrənilməsinə başlamağa həsr olunmuşdur. Filosof, akademik Əfrand Daşdəmirov burada qeyd etmişdir:[33]

  28 aprel və 28 may tarixləri xalqın tarixi yaddaşında əks siyasi sistemləri və dəyərləri, o dövrün rəqib gücləri arasındakı siyasi qarşıdurmanı təcəssüm etdirir. Lakin müasir Azərbaycan xalqı üçün bu tarixlər fərqli məna daşıyır – bunlar Azərbaycan milli dövlətçiliyinin bərpası, inkişafı və möhkəmləndirilməsi, Azərbaycan millətinin konsolidasiyası və inkişafı ilə bağlı vahid tarixi prosesin mərhələləridir.  

Tarixçi Cəmil Quliyev öz məruzəsində 28 may 1918-ci il və 28 aprel 1920-ci il tarixlərini vahid prosesin hissələri kimi qiymətləndirmiş, Azərbaycan Demokratik Respublikasının Azərbaycan Sovet Sosialist Respublikasının yaradılmasına şərait yaratdığını qeyd etmişdir.[33] Digər bir tarixçi, akademik Əlisöhbət Sumbatzadə öz çıxışında vurğulamışdır ki, AXC dövründə həyata keçirilən suverenlik və dövlətçilik ideyaları Sovet dövründə möhkəmləndirilmiş və inkişaf etdirilmişdir, buna görə də 28 may və 28 aprel Azərbaycan xalqının tarixində layiqli yer tutmalıdır.[33]

Azərbaycan Respublikası və Naxçıvan MR

Əsas məqalələr: Azərbaycan və Naxçıvan Muxtar Respublikası

1991-ci ilin oktyabr ayının 18-də Azərbaycan Respublikasının Ali Soveti Dövlət Müstəqilliyi haqqında Konstitusiya Aktını qəbul etmişdir. 1991-ci il dekabrın 30-da isə Konstitusiya Aktı ümumxalq səsverməsi və referendum yolu ilə təsdiq edilmişdir. Bu akt Azərbaycan Respublikasının dövlət müstəqilliyinin təmin edilməsi üçün hüquqi əsas yaratmış və ölkə öz dövlət müstəqilliyini bütün dünyaya bəyan etmişdir.[34] Konstitusiya aktında Azərbaycan Respublikası Azərbaycan Xalq Cümhuriyyətinin hüquqi varisi elan edilmişdir:[35][36]

  Maddə 2. Azərbaycan Respublikası 1918-ci il mayın 28-dən 1920-ci il aprelin 28-dək mövcud olmuş Azərbaycan Respublikasının varisidir.  

Azərbaycan Respublikasının Ali Soveti Azərbaycan Milli Şurasının 1918-ci il mayın 28-də qəbul etdiyi İstiqlal Bəyannaməsinə, Azərbaycan Respublikasının demokratik prinsiplərinin və ənənələrinin varisliyinə əsaslanaraq və "Azərbaycan Respublikasının dövlət müstəqilliyinin bərpası haqqında" Azərbaycan Respublikası Ali Sovetinin 1991-ci il 30 avqust tarixli Bəyannaməsini rəhbər tutaraq bu Konstitusiya Aktını qəbul etmiş və müstəqil Azərbaycan Respublikasının dövlət quruluşunun, siyasi və iqtisadi quruluşunun əsaslarını təsis etmişdir.[37][38][39] 21 dekabr 1991-ci ildə Alma-Ata bəyannaməsinin imzalanması nəticəsində keçmiş sovet dövlətləri bir-birinin ərazi bütövlüyünü və mövcud sərhədlərin toxunulmazlığını tanımışdır.[40]

2023-cü il sentyabrın 19-da Azərbaycanın Qarabağ iqtisadi rayonunda törədilən genişmiqyaslı təxribatların qarşısının alınması və Ermənistan silahlı qüvvələrinin qalıqlarının tərk-silah edilərək Qarabağdan çıxarılması, həmin ərazilərdə Azərbaycan Respublikası Konstitusiyası quruluşunun bərpa edilməsi məqsədilə antiterror əməliyyatına başlanmışdır. Sentyabrın 20-də başa çatmış əməliyyat nəticəsində Azərbaycan Ordusu Azərbaycan Respublikasının suverenliyi tam bərpa etmişdir.[41] Bu tarix Azərbaycan Prezidenti İlham Əliyevin 2024-cü il sentyabrın 19-da imzaladığı "Azərbaycan Respublikasında Dövlət Suverenliyi Gününün təsis edilməsi haqqında" sərəncamına əsasən Dövlət Suverenliyi Günü kimi qeyd edilir.[42]

2025-ci ildə Türkiyəli tarixçi, professor İlbər Ortaylı Azərbaycanın xarici siyasəti və diplomatiyasının sanki 1000 ildir ki, qurulduğunu qeyd etmişdir: "Azərbaycan xarici əlaqələrdə, diplomatik münasibətlərdə çox yüksək səviyyədədir. Mən onlara valeh olmuşam. Sanki həmin əlaqələr min ildir ki, qurulub. Mən buna məəttəl qalmışam".[43]

Azərbaycan dövlətçiliyinin təbliği və tətbiqi

Həmçinin bax: ASAN xidmət və DOST Agentliyi
 
ASAN xidmət

2024-cü ildə BƏƏ Hökumət İnkişafı və Gələcəyi naziri Uhud Əl-Rumi Azərbaycanın inkişaf modelinin başqa ölkələrə ilham verdiyini qeyd etmişdir.[44] 2025-ci ildə ŞƏT tədbirləri çərçivəsində Azərbaycan Prezidenti İlham Əliyevlə görüşən Çin lideri Si Tsinpin Azərbaycanın suveren inkişaf modelini dəstəklədiyini demişdir.[45]

2024-cü ildə Bakıda keçirilən COP29 çərçivəsində Azərbaycan hökuməti ilə BMT arasında "Töhfə sazişi" imzalanmışdır. Sazişin əsas məqsədi Azərbaycanın ASAN xidmətinin BMT xətti ilə 4 qitədə tətbiq və təşviq edilməsi, dövlətlərin göstərdiyi xidmət vasitəsilə vətəndaş hüquqlarının reallaşdırılması və yeni texnologiya və innovasiyanın tətbiq edilməsi ilə bağlı tədbirlərin keçirilməsidir.[46]

Azərbaycanın ASAN xidmət mərkəzi 2025-ci il məlumatına görə, 25-dən çox ölkəyə ixrac edilib.[47] Ruminiya rəsmiləri ASAN xidmətin ölkədə tətbiqi üçün 2024-cü ildə Azərbaycanla müqavilə imzalayıb.[48] 2025-ci ildə Kolumbiya, Ruanda, Qvineya-Bisau və Somali rəsmiləri ASAN xidməti öz ölkələrində tətbiq etmək üçün Azərbaycanla müqavilə imzalayıblar.[49][50][47][51] Efiopiyada 2025-ci ildə ASAN xidmət modeli əsasında "MESOB" dövlət xidməti mərkəzi açılıb. Efiopiya bu mərkəzə görə Azərbaycana təşəkkür edərək, belə mərkəzlərin sayını artırmağı planlaşdırdığını qeyd edib.[52] Pakistan da ASAN xidmət modelini ölkə daxilində tətbiq edir.[53] Bundan başqa Azərbaycanın Dost Agentliyinin təcrübəsi Moldova tərəfindən öyrənilmiş, DOST modelinə əsasən Moldovanın müxtəlif regionlarında pilot layihələr icra edilmişdir.[54] 2025-ci ildə Serbiya ilə imzalanmış müqaviləyə əsasən, Azərbaycan Xüsusi Təyinatlıları Serbiya hərbçilərinə təlim keçmişdir.[55]

2025-ci ildə Bakıda keçirilən III Beynəlxalq Statistika Forumunda Özbəkistan Milli Statistika Komitəsinin sədri Behzod Hamrayev bəyan edib ki, Azərbaycanın statistika sahəsindəki təcrübəsi Özbəkistan tərəfindən siyahıyaalmanın təşkilində, anketlərin və metodologiyanın işlənib hazırlanmasında, statistikanın inkişafına dair ilk strategiyanın yaradılmasında istifadə edilmişdir. Macarıstan isə Azərbaycanla bu sahədə təcrübə mübadiləsinə hazır olduğunu, Azərbaycanın göstəricilərin rəqəmsal təhlili praktikasını istədiklərini qeyd etmişdir.[56][57] 2025-ci ilin noyabrında Qırğızıstan həmkarlar ittifaqlarının nümayəndələrinin Azərbaycanın Əmək və Sosial Münasibətlər Akademiyasının İxtisasartırma və Kadrların İnkişafı Mərkəzində təşkil edilən informasiya təhlükəsizliyi, süni intellekt və əmək hüquqlarına dair təlimlərdə iştirak edəcəyi elan edilmişdir.[58]

Azərbaycan Ədliyyə Nazirliyinin Ədliyyə Akademiyası ilə Qazaxıstan Respublikası Ali Məhkəmə Şurası yanında Ədalət Akademiyası arasında imzalanmış Əməkdaşlıq memorandumuna əsasən, 2025-ci ilin dekabrında Qazaxıstandan olan hakimliyə namizədlər üçün Azərbaycanda təcrübə proqramı keçirilmişdir. Onlar Azərbaycan məhkəmə sisteminin fəaliyyəti ilə tanış edilmişdir. Namizədlər həm də Azərbaycan məhkəmələrində və ASAN xidmətdə olaraq onların işi ilə yaxından tanış edilmişdir.[59]

İstinadlar

  1. ↑ Бeйлиc — Coчинeния Macyдa ибн Haмдapa, c.19, 28, 31.
  2. ↑ Aлизaдe — Coциaльнo-экoнoмичeckaя и пoлитичeckaя иcтopия Aзepбaйджaнa, c.207–209
  3. ↑ Aшypбeйли. Oчepк… c.106–107.
  4. ↑ Mustafazadə, 2005. səh. 89
  5. ↑ Mustafazadə, 2005. səh. 90
  6. ↑ Əmrahov Mais, Çingizoğlu Ənvər, Həsənov Habil. s.38.
  7. ↑ Bayramova Nailə. s.24
  8. ↑ Hüseynov Yunis. s.50.
  9. ↑ "История Востока. В 6 т. Т. 2. Восток в средние века". 14 mart 2013 tarixində arxivləşdirilib. İstifadə tarixi: 14 dekabr 2015.
    Orijinal mətn (rus.)
    Говоря о возникновении азербайджанской культуры именно в XIV-XV вв., следует иметь в виду прежде всего литературу и другие части культуры, органически связанные с языком. Что касается материальной культуры, то она оставалась традиционной и после тюркизации местного населения. Впрочем, наличие мощного пласта иранцев, принявших участие в формировании азербайджанского этноса, наложило свой отпечаток прежде всего на лексику азербайджанского языка, в котором огромное число иранских и арабских слов. Последние вошли и в азербайджанский, и в турецкий язык главным образом через иранское посредство. Став самостоятельной, азербайджанская культура сохранила тесные связи с иранской и арабской. Они скреплялись и общей религией, и общими культурно-историческими традициями
  10. ↑ Field Listing :: Ethnic groups Arxivləşdirilib 2019-01-06 at the Wayback Machine (англ.). The World Factbook. ЦРУ. Проверено 23 мая 2012.
  11. ↑ Encyclopædia Iranica: Iran V. Peoples Of Iran. A General Survey Arxivləşdirilib 2011-08-10 at the Wayback Machine

    The Azeri Turks are Shiʿites and were founders of the Safavid dynasty.
  12. ↑ Mazzaoui, Michel B; Canfield, Robert (2002). "Islamic Culture and Literature in Iran and Central Asia in the early modern period". Turko-Persia in Historical Perspective. Cambridge University Press. pp. 86–7. ISBN 978-0-521-52291-5.
    Orijinal mətn (ing.)
    Safavid power with its distinctive Persian-Shi'i culture, however, remained a middle ground between its two mighty Turkish neighbors. The Safavid state, which lasted at least until 1722, was essentially a "Turkish" dynasty, with Azeri Turkish (Azerbaijan being the family's home base) as the language of the rulers and the court as well as the Qizilbash military establishment. Shah Ismail wrote poetry in Turkish. The administration nevertheless was Persian, and the Persian language was the vehicle of diplomatic correspondence (insha'), of belles-lettres (adab), and of history (tarikh)
  13. ↑ Swietochowski, Tadeusz (2004), "Azerbaijani khanates and the conquest by Russia", Russian Azerbaijan, 1905–1920: The Shaping of National Identity in a Muslim Community, Cambridge, UK: Cambridge University Press, ISBN 0521522455 ''Thus began a half-century-long period of Azerbaijani independence, albeit in a condition of deep political fragmentation and internal warfare''
  14. ↑ Tadeusz Swietochowski, Russia and Azerbaijan: A Borderland in Transition (New York: Columbia University Press), 1995, page 27–28
  15. ↑ Mostashari, 2006. səh. 13
  16. ↑ SHIONOZAKI, Shinya. (2015). The Transition from Tatar to Azerbaijani. Bulletin of the Society for Near Eastern Studies in Japan. 57. 41–62. 10.5356/jorient.57.2_41. page 41.
  17. ↑ Tahirli, Abid. "Ziya təşnəsi, yaxud 2013-dən 1879-a bir nəzər: «Ziya» qəzetində məktəb və maarif məsələləri". "Ədəbiyyat qəzeti". 31 yanvar 2014. 23 dekabr 2024 tarixində arxivləşdirilib. İstifadə tarixi: 12 dekabr 2024.
  18. ↑ Çağman, F. (1973). Şehname-i Selim Han ve Minyatürleri. Sanat Tarihi Yıllığı(5), 411–442.
  19. ↑ İnalcık, 2011. səh. 43-45
  20. ↑ İnalcık, 2011. səh. 121
  21. ↑ İnalcık, 2011. səh. 346
  22. ↑ İnalcık, 2011. səh. 414
  23. ↑ Feldman, 2024. səh. 49
  24. ↑ "История Востока. В 6 т. Т. 2. Восток в средние века". 14 mart 2013 tarixində arxivləşdirilib. İstifadə tarixi: 14 dekabr 2015.
    Orijinal mətn (rus.)
    Говоря о возникновении азербайджанской культуры именно в XIV-XV вв., следует иметь в виду прежде всего литературу и другие части культуры, органически связанные с языком. Что касается материальной культуры, то она оставалась традиционной и после тюркизации местного населения. Впрочем, наличие мощного пласта иранцев, принявших участие в формировании азербайджанского этноса, наложило свой отпечаток прежде всего на лексику азербайджанского языка, в котором огромное число иранских и арабских слов. Последние вошли и в азербайджанский, и в турецкий язык главным образом через иранское посредство. Став самостоятельной, азербайджанская культура сохранила тесные связи с иранской и арабской. Они скреплялись и общей религией, и общими культурно-историческими традициями
  25. ↑ Field Listing :: Ethnic groups Arxivləşdirilib 2019-01-06 at the Wayback Machine (англ.). The World Factbook. ЦРУ. Проверено 23 мая 2012.
  26. ↑ Ahmadoghlu, 2020. səh. 549
  27. ↑ 1 2 Azərbaycan Xalq Cümhuriyyəti Ensiklopediyası (PDF). Lider nəşriyyat. 2004. 440. 13 oktyabr 2020 tarixində arxivləşdirilib (PDF). İstifadə tarixi: 19 fevral 2017.
  28. ↑ 1 2 3 Azərbaycan Demokratik Respublikası: Azərbaycan höküməti (1918–1920) (PDF). Gənclik. 1990. 16 yanvar 2018 tarixində arxivləşdirilib (PDF). İstifadə tarixi: 19 fevral 2017.
  29. ↑ Azərbaycan Xalq Cümhuriyyəti Ensiklopediyası. I cild. Bakı: "Lider". 2004. səh. 288. ISBN 9952-417-14-2.
  30. ↑ "The Supreme Council of the Azerbaijan SSR (1920-1991)". The Supreme Council of the Azerbaijan SSR (1920-1991) (ingilis). İstifadə tarixi: 22 avqust 2024.
  31. ↑ 1 2 Азәрбајҹан ССР Назирләр Совети // Азәрбајҹан Совет Енсиклопедијасы: [10 ҹилддә]. I ҹилд: А—Балзак. Бакы: Азәрбајҹан Совет Енсиклопедијасынын Баш Редаксијасы. Баш редактор: Ҹ. Б. Гулијев. 1976. С. 174.
  32. ↑ "28 aprel nə günüdür? - SORĞU". İstifadə tarixi: 26 dekabr 2025.
  33. ↑ 1 2 3 28 апреля 1920 года — историческая веха в летописи Азербайджана, 1991. səh. 1-2
  34. ↑ "Müstəqillik Günü haqqında Azərbaycan Respublikasının Qanunu" (az.). president.az. 28 may 2022 tarixində arxivləşdirilib. İstifadə tarixi: 5 fevral 2023.
  35. ↑ http://ask.org.az/wp-content/uploads/2019/10/Konstitusiya_ENG.pdf%7Ctitle=The Constitution of the Republic of Azerbaijan
  36. ↑ https://republic.preslib.az/en_d2.html%7Ctitle=The Arxivləşdirilib 2022-06-13 at the Wayback Machine Constitutional Act on the State Independence of the Republic of Azerbaijan (18 October 1991)
  37. ↑ "Azərbaycan Respublikasının dövlət müstəqilliyi haqqında Konstitusiya Aktı (18 oktyabr 1991)" (PDF). 15 dekabr 2017 tarixində orijinalından (PDF) arxivləşdirilib. İstifadə tarixi: 18 oktyabr 2017.
  38. ↑ "Azərbaycan Respublikasının dövlət müstəqilliyinin bərpasının 20-ci ildönümü" (PDF). 8 mart 2022 tarixində arxivləşdirilib (PDF). İstifadə tarixi: 18 oktyabr 2017.
  39. ↑ "18 oktyabr Azərbaycanın dövlət müstəqilliyi günüdür". 3 avqust 2020 tarixində arxivləşdirilib. İstifadə tarixi: 18 oktyabr 2017.
  40. ↑ "THE ALMA-ATA DECLARATION". İstifadə tarixi: 26 dekabr 2025.
  41. ↑ Azərbaycan Dövlət İnformasiya Agentliyi (AZƏRTAC). "Məlumat vərəqələri antiterror tədbirlərinin aparıldığı ərazidə paylanılır". www.azertag.az (az.). 2023-09-20. 2023-09-23 tarixində arxivləşdirilib. İstifadə tarixi: 20.09.2023.
  42. ↑ "Azərbaycan Respublikasında Dövlət Suverenliyi Gününün təsis edilməsi haqqında Azərbaycan Respublikası Prezidentinin Sərəncamı". president.az. 19 sentyabr 2024. 19 sentyabr 2024 tarixində arxivləşdirilib. İstifadə tarixi: 19 sentyabr 2024.
  43. ↑ ""Azərbaycanın diplomatik münasibətlərinə valeh olmuşam, sanki min ildir qurulub" - İlbər Ortaylı - VİDEO". İstifadə tarixi: 27 dekabr 2025.
  44. ↑ "UAE minister: Azerbaijan's development model inspires other countries". İstifadə tarixi: 3 sentyabr 2025.
  45. ↑ "China supports Azerbaijan's sovereign development model - Xi Jinping". İstifadə tarixi: 3 sentyabr 2025.
  46. ↑ "Ülvi Mehdiyev: "ASAN xidmət" modelini tətbiq edən ölkələr Azərbaycana və onun prezidentinə təşəkkür edir". 11 aprel 2025 tarixində arxivləşdirilib. İstifadə tarixi: 5 iyul 2025.
  47. ↑ 1 2 "Somali "ASAN xidmət" təcrübəsini yerində öyrənir". İstifadə tarixi: 5 iyul 2025.
  48. ↑ ""ASAN xidmət" təcrübəsi Rumıniyada". İstifadə tarixi: 5 iyul 2025.
  49. ↑ ""ASAN xidmət" təcrübəsi ilk dəfə Amerika qitəsində". 25 mart 2025 tarixində arxivləşdirilib. İstifadə tarixi: 5 iyul 2025.
  50. ↑ ""ASAN xidmət" Ruandada tətbiq ediləcək". İstifadə tarixi: 5 iyul 2025.
  51. ↑ "Azərbaycanın uğurlu inkişaf modeli bir sıra dövlətlər tərəfindən öyrənilir və tətbiq edilir". İstifadə tarixi: 3 sentyabr 2025.
  52. ↑ "Efiopiyada "ASAN xidmət" mərkəzi açıldı - Fotolar". İstifadə tarixi: 5 iyul 2025.
  53. ↑ ""ASAN Xidmət" modelinin Pakistanda da həyata keçirilməsi məsələsi müsbət addım kimi qiymətləndirilib". İstifadə tarixi: 3 sentyabr 2025.
  54. ↑ "Azərbaycan-Moldova birgə hökumətlərarası komissiyanın 6-cı iclası keçirildi - Fotolar". İstifadə tarixi: 20 sentyabr 2025.
  55. ↑ "Xüsusi təyinatlılarımız Serbiya hərbçilərinə məşq keçdi – VİDEO". İstifadə tarixi: 5 iyul 2025.
  56. ↑ "Aron Kinçeş: Statistika sahəsində təcrübə mübadiləsi ümumi işə fayda verə bilər". İstifadə tarixi: 20 sentyabr 2025.
  57. ↑ "Özbəkistan Azərbaycan təcrübəsi əsasında 36 ildən sonra ilk dəfə əhalisini siyahıya alacaq - EKSKLÜZİV". İstifadə tarixi: 20 sentyabr 2025.
  58. ↑ "Qırğızıstan həmkarlar ittifaqlarının nümayəndələri AHİK-də - Fotolar". İstifadə tarixi: 19 oktyabr 2025.
  59. ↑ "Qazaxıstanın hakimliyə namizədləri Ədliyyə Akademiyasında təcrübə keçib". İstifadə tarixi: 17 dekabr 2025.

Ədəbiyyat

  • Halil İnalcık (2011). Has-Bağçede ʿAyş u Tarab: Nedimler, Şairler, Mutribler. İstanbul: Türkiye İş Bankası Kültür Yayınları.
  • Feldman, Walter. Music of the Ottoman Court. Brill. 2024. səh. 554.
  • Mostashari, Firouzeh, On the religious frontier: Tsarist Russia and Islam in the Caucasus, New York, 2006
  • Ahmadoghlu, Ramin. "Secular nationalist revolution and the construction of the Azerbaijani identity, nation and state". Nations and Nationalism. Wiley. 27. 2020: 548–565. doi:10.1111/nana.12682.
  • 28 апреля 1920 года — историческая веха в летописи Азербайджана, Бакинский рабочий,, — № 82 (22107), 1991
  • Ənvər Çingizoğlu, Mаis Əmrаhоv, Habil Həsənоv. Qаrаbаğ хаnlığı. Bakı: "Mütərcim". 2008. 208 səh.
  • Bayramova Nailə. Şamaxı xanlığı (PDF). Bakı: "Təhsil". 2009. 396 səh. Archived from the original on 28 dekabr 2016. İstifadə tarixi: 11 fevral 2018.
  • Yunis Hüsеynоv. Şuşa şəhərinin tarixi (PDF). Bakı: "Şuşa". 2013. 156 səh.
  • Mustafazadə, Tofiq. Quba xanlığı (az.). Bakı: Elm. 2005. 480 səh.
Mənbə — "https://az.wikipedia.org/w/index.php?title=Azərbaycan_dövlətçiliyi&oldid=8420361"
Informasiya Melumat Axtar