Böyük Çöl turu

Böyük Çöl turu (gürc. Ұлы Дала Жорығы, ing. The Great Steppe Tour) — dünyada ilk dəfə Qazaxıstan ərazisində təşkil olunan, 1200 kilometr məsafəni əhatə edən atlı marafon. Marafon iştirakçıları marşrutu Qazaxıstanın müxtəlif iqlim zonaları arasındakı temperatur fərqlərinin, əhalisiz çöllərin və səhra landşaftlarının müşayiəti ilə tamamilə təbii şəraitdə qət edirlər.^[1]

Bu yarışın əsas özəlliyi komandaların ümumi hesablanmış vaxta əsaslanan prinsiplə mübarizə aparmasıdır. Marafon ilk dəfə 18–29 sentyabr 2022-ci ildə Qazaxıstanın beş bölgəsində — Akmola, Karaganda, Ulıtau, Qızılorda və Türküstan vilayətlərində keçirilmişdir. Növbəti illərdə tədbirin ildə bir dəfə, Monqolustan, Rusiya, Qırğızıstan, Özbəkistan və digər ölkələrin komandalarının iştirakı ilə keçirilməsi planlaşdırılır.

Yarış komandalar üzrə ümumi vaxt göstəricisinə əsasən keçirilir. Hər komanda 5 atlı və 10 atdan ibarət heyətlə (hər atlıya 2 at düşür) komplektləşdirilir. İştirakçılar 1200 kilometrlik məsafəni 12 gün ərzində qət etməlidirlər. Marafon 12 mərhələdən ibarətdir və hər mərhələ 100 kilometr təşkil edir. Atlıların marşrutun yarısını — 600 kilometri keçdikdən sonra at dəyişməsinə icazə verilir. Hər komanda üçün fərdi vaxt qeydə alınır və bütün 12 mərhələnin nəticələrinə görə 1200 kilometri ən qısa zamanda başa vuran komanda qalib elan olunur.^[2]