Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edinBərdə-Ağdam avtomobil yolu — Azərbaycanın Qarabağ və Şərqi Zəngəzur iqtisadi rayonları ərazisində inşa edilmiş magistral avtomobil yolu.
| Bərdə-Ağdam avtomobil yolu |
|---|
Yolun təməlqoyma mərasimi 2021-ci il mayın 28-də Azərbaycan Respublikasının Prezidenti İlham Əliyevin iştirakı ilə keçirilmişdir.[1] 2022-ci ilin oktyabrında Prezident İlham Əliyev tikinti işlərinin gedişi ilə tanış olmuşdur. Həmin vaxt layihə üzrə torpaq işləri başa çatdırılmış, ümumi iş həcminin 75 faizi icra edilmişdi. Layihə çərçivəsində yol boyu 4 körpünün, 3 yolüstü piyada keçidinin və 29 avtobus dayanacağının inşası nəzərdə tutulurdu. Dayanacaqların 14-nün tikintisi həmin mərhələdə tamamlanmışdı.[2] Yolun istifadəyə verilməsi isə 24 dekabr 2023-cü ildə baş tutmuşdur.[3][4]
Başlanğıcını Bərdə şəhərindən götürən yolun uzunluğu 44,5 kilometrdir və dörd hərəkət zolaqlı olmaqla I texniki dərəcəyə uyğun inşa edilmişdir.[1][3] Yolun eni 26,5 metr olmaqla Qarabağ bölgəsinin inkişaf planı nəzərə alınaraq layihələndirilmişdir.[2]
Yolun 25-ci və 40-cı kilometrlik hissələrində müvafiq olaraq 91,3 metr və 18,2 metr uzunluğunda körpülər, 14-cü və 42-ci kilometrlik hissələrdə 66 metr və 43 metr uzunluğunda yol qovşaqları inşa edilmişdir. Həmçinin 4-cü, 14-cü və 16-cı kilometrlik hissələrdə yerüstü piyada keçidləri qurulmuşdur.[3][4]
Azərbaycan Avtomobil Yolları Dövlət Agentliyi tərəfindən inşa olunan yol boyunca üfüqi nişanlanma xətləri çəkilmiş, yol nişanları, məsafə göstəriciləri və məlumatverici lövhələr quraşdırılmışdır.[3] Tikintidə "Körpü-Bina-Tikinti" MMC və "54 №-li Yol İstismarı" MMC subpodratçı kimi iştirak etmişdir.[5]
Yolun ilk 14 kilometrlik hissəsi Bərdə şəhəri və bir neçə yaşayış məntəqəsinin daxilindən keçir. Ümumilikdə isə Bərdə və Ağdam şəhərləri də daxil olmaqla, həmin rayonların 20-dən çox yaşayış məntəqəsini əhatə edir.[1][4]
- ↑ 1 2 3 "İlham Əliyev Bərdə-Ağdam avtomobil yolunun təməlqoyma mərasimində iştirak edib". president.az. Azərbaycan Respublikası Prezidentinin rəsmi internet saytı. 28 may 2021. İstifadə tarixi: 25 noyabr 2025.
- ↑ 1 2 "İlham Əliyev Bərdə-Ağdam avtomobil yolunda görülən işlərlə tanış olub". president.az. Azərbaycan Respublikası Prezidentinin rəsmi internet saytı. 4 oktyabr 2022. İstifadə tarixi: 25 noyabr 2025.
- ↑ 1 2 3 4 "İlham Əliyev Bərdə-Ağdam avtomobil yolunun açılışında iştirak edib". president.az. Azərbaycan Respublikası Prezidentinin rəsmi internet saytı. 24 dekabr 2023. İstifadə tarixi: 25 noyabr 2025.
- ↑ 1 2 3 "Bərdə-Ağdam avtomobil yolu istifadəyə verilib". Report. 24 dekabr 2023. İstifadə tarixi: 25 noyabr 2025.
- ↑ "Bərdə-Ağdam avtomobil yolunun tikintisi sürətlə davam etdirilir". Azərbaycan Avtomobil Yolları Dövlət Agentliyi. 7 fevral 2022. İstifadə tarixi: 25 noyabr 2025.