Cyukucikun (熟字訓?) — yapon dilində orijinal yaponca sözün iki və ya daha çox kanci ilə yazılması üsulu. Oxunuş bütün birləşməyə verilir və sözün hansı hissəsinin hansı heroqlifə aid olduğunu müəyyən etmək mümkün deyil. Bu zaman heroqliflərin standart oxunuşları adətən nəzərə alınmır, lakin onların mənaları sözün mənasına uyğun gəlir.[1]
Cyukucikun oxunuşuna bir çox yapon toponimləri və şəxsi adlarda rast gəlinir. Çox vaxt heroqliflərin tərkibindəki mənalar oxunuşlarından uzaq olur. Məsələn, Yaponiyanın qədim adı Yamato 大和 (hərf. "böyük harmonya") şəklində yazılır, onun qədim paytaxtı Asuka isə 飛鳥 (hərf. "uçan quş") kimi ifadə olunur. Bu, ritsuryo sisteminin tətbiq edilməsi dövründə baş vermişdir. O zaman bütün yapon toponimlərinə Çin üslubunda iki heroqlifli adlar verilmiş, lakin qədim yapon adları saxlanmış və həmin heroqliflərin oxunuşu kimi qəbul edilmişdir.
- ↑ "Чэнь Ливэй:日中両言語の交渉に見る熟字訓の形成". 16 yanvar 2017 tarixində arxivləşdirilib. İstifadə tarixi: 3 dekabr 2011.