Doğum evi

Doğum evi — tibb bacılarının və ya ginekoloqların fəaliyyət göstərdiyi, doğuş prosesində olan analara xidmət təqdim edən tibb müəssisəsi. Buradakı işçilər lazım gəldikdə doğuma hazırlıq üzrə mütəxəssislər də prosesə dəstək verirlər. İşçi heyəti doğuş zamanı həm ananın, həm də körpənin vəziyyətini izləyir. Əlavə tibbi müdaxilə tələb olunduğu hallarda ana xəstəxanaya köçürülür.^[1][2]

Doğum evləri adətən xəstəxanaların doğuş şöbələrinə nisbətən daha evabənzər mühit təqdim edir və doğuş prosesində daha geniş seçim imkanı yaradır. Burada ana qida və içki qəbul edə, musiqidən istifadə edə, istədiyi halda ailə üzvlərini və dostlarını yanında saxlaya bilər. Bir çox doğum evləri qeyri-institusional mebellə təchiz olunmuş olur. Məsələn, həm ananın, həm də atanın rahat yerləşə biləcəyi iri çarpayılar, habelə su ilə doğuş üçün vanna və ya duş kabinələri mövcud olur. Bu cür imkanlar doğuş ağrılarının azalmasına kömək edir.^[3] Bundan başqa, doğum mərkəzlərində ağrını azaltmaq üçün opioid inyeksiyaları və entonoks qazı da təklif olunur. İnteryerin tərtibatı doğuşun təbii proses kimi qəbul edilməsinə yönəlir. Qadınlar burada daha sərbəst hərəkət edə bilir. Aktiv doğuş praktikası ümumilikdə dəstəklənir.^[1][4]

"Cochrane" tərəfindən 2012-ci ildə aparılmış icmal ənənəvi xəstəxana doğuşları ilə xəstəxana daxili və ya yaxınlığında təşkil olunan evəbənzər alternativ mühitləri müqayisə etmişdir. Tədqiqat göstərmişdir ki, belə mühitlərdə spontan vaginal doğuşların sayı artır, ana südü ilə qidalanma altı–səkkiz həftə ərzində daha yüksək davamlılıq göstərir və analar ümumilikdə göstərilən xidmətə daha müsbət yanaşırlar.^[5] İcmal həmçinin müəyyən etmişdir ki, alternativ doğum mərkəzlərində doğuş tibbi müdaxilə ehtimalını azaldır və bunun ana və uşaq üçün risk yaratdığına dair göstərici yoxdur. Bununla belə, hamiləlik dövründə ola biləcək risklər və ya əvvəlcədən mövcud tibbi vəziyyətlər ananın doğum mərkəzindən istifadə imkanını məhdudlaşdıra bilər.^[6]