Faylın adı

Faylın adı (ing. filename) — faylı başqa fayllardan fərqləndirmək üçün ona aid edilən hərflər, rəqəmlər və başqa yolverilən simvollar yığını.

Faylın adı, adətən, onun tipini və ya təyinatını geniş təsvir edən uzantı (ing. Extension) ilə müşayiət olunur. MS-DOS əməliyyat sistemində faylın adı səkkiz simvoldan artıq ola bilməz, həm də faylın adında hərf və rəqəmlərlə yanaşı, defis və altcizgi simvolları kimi, bəzi durğu işarələrindən də istifadə etmək olar. Mac OS əməliyyat sistemində faylın adı 31 simvoladək ola bilər və onların arasında iki nöqtədən (:) başqa istənilən simvol ola bilər (: simvolundan yolun (PATHNAME) elementlərini bir-birindən ayırmaq üçün istifadə olunur). OS/2 sisteminin HPFS fayl altsistemində fayların adlarının uzunluğu 254 simvoladək ola bilər, ancaq disksürənin hərfindən, yoldan və faylın adından ibarət olan kombinasiyanın uzunluğu 259 simvolu aşa bilməz. NTFS fayl sisteminin istifadə olunduğu Windows NT əməliyyat sistemində faylın adı 255 simvoladək ola bilər. HPFS və NTFS sistemlərində faylın adında boşluq simvolundan istifadə etməyə icazə verilir.

Bir çox nəşriyyatlar bitişik deyil, "file name" yazılışına üstünlük verir.^[1]