Hərbi İdarəetmə İnstitutu

Hərbi İdarəetmə İnstitutu Azərbaycan Respublikası Müdafiə Nazirliyinin strukturuna daxil olan Milli Müdafiə Universitetinin tabeliyində fəaliyyət göstərən, əlavə təhsil proqramlarını, ali təhsilin magistratura səviyyəsində kadr hazırlığını həyata keçirən, nəzəri-metodoloji, pedaqoji-metodiki və tətbiqi-elmi tədqiqatlar aparan xüsusi təyinatlı ali təhsil müəssisəsidir.

Hərbi İdarəetmə İnstitutunun fəaliyyətinin məqsədi Azərbaycan Respublikasının Silahlı Qüvvələri üçün ali təhsilin magistratura səviyyəsi üzrə ali hərbi təhsilli zabit kadrları hazırlamaq, hərbi elmlər sahəsində elmi tədqiqat işləri aparmaq və əlavə təhsil üzrə kadr hazırlığını həyata keçirməkdir. Hərbi İdarəetmə İnstitutu Azərbaycan Silahlı Qüvvələrinin Hərbi Akademiyasının hüquqi varisidir.

Silahlı Qüvvələrin Hərbi Akademiyası Azərbaycan Prezidenti Heydər Əliyevin 20 fevral 1999-cu il tarixli fərmanı ilə Azərbaycan Respublikası Silahlı Qüvvələri üçün ali hərbi təhsilli komandir və qərargah zabitlərinin, hərbi-elmi işçilərin hazırlanmasını, onların ixtisasının artırılmasını, hərbi iş sahəsində elmi tədqiqatların aparılmasını və dövlət orqanlarında çalışan yüksək vəzifəli şəxslərə respublikanın müdafiəsi ilə əlaqədar hərbi-strateji, hərbi-iqtisadi və hərbi-siyasi məsələlərin öyrədilməsini təmin etmək məqsədilə yaradılmışdır.

İnstitutun fəaliyyətinin əsas istiqamətləri tədris, təlim-tərbiyə, metodiki və elmi tədqiqat işlərindən ibarətdir. Hərbi Akademiya Silahlı Qüvvələr üçün hərbi-nəzəri və hərbi-praktiki biliklərə yiyələnmiş, intellektual təfəkkürə malik, əməliyyat-strateji və əməliyyat-taktiki səviyyələrdə hərbi idarəetmə orqanlarında komanda, qərargah vəzifələrində və digər vəzifələrdə xidmət etmək üçün ali hərbi təhsilli zabit kadrları hazırlanmasında müstəsna rol oynayıb.

27 sentyabr 2020-ci ildə başlanan II Qarabağ müharibəsində aparılan döyüşlərə Hərbi Akademiyanın zabit-gizir heyəti də qatılmış və onlardan 4 nəfər hərbi qulluqçu müxtəlif dərəcəli bədən xəsarəti almış və qazilik mərtəbəsinə yüksəlmişdir. Hərbi Akademiyanın 53 nəfərdən çox hərbi qulluqçusu göstərdikləri şücaətə görə orden və medallarla təltif olunmuşdur.

44 günlük Vətən müharibəsindən sonra qalib Azərbaycan Ordusunun müharibədə qazandığı təcrübə, bilik və bacarıqları yüksəltmək məqsədilə ordu quruculuğunda mühüm addımlar atıldı. Belə ki, xüsusi təyinatlı təhsil müəssisələri şəbəkəsinin fəaliyyətini təkmilləşdirmək məqsədilə Azərbaycan Respublikası Prezidentinin 5 mart 2022-ci il tarixli, 1626 nömrəli fərmanı ilə Silahlı Qüvvələrin Hərbi Akademiyasının əsasında Hərbi İdarəetmə İnstitutu yaradılaraq Milli Müdafiə Universitetinin tabeliyinə verildi. Hərbi İdarəetmə İnstitutunda təşkil edilmiş tədris işi hərbi-nəzəri və hərbi-praktiki biliklərə yiyələnmiş, intellektual təfəkkürə malik, əməliyyat-strateji və əməliyyat-taktiki səviyyələrdə hərbi idarəetmə orqanlarında komanda, qərargah vəzifələrində və digər vəzifələrdə xidmət etmək üçün ali hərbi təhsilli zabit kadrları hazırlamaqdan, bütün növ tədris məşğələlərini planlaşdırmaq və həyata keçirilməkdən, kurs və diplom işlərinə, təcrübi məşğələlərə rəhbərlik etməkdən, təhsilalanların tədris materialını mənimsəməsinin qiymətləndirməkdən ibarətdir.

Hərbi İdarəetmə İnstitutu nəzdində Strateji araşdırmalar və dövlət müdafiəsini idarəetmə akademik kursu və Xarici dil mərkəzi fəaliyyət göstərir. Kursların vəzifəsi respublikanın müdafiəsi ilə əlaqədar, hərbi-strateji, hərbi-iqtisadi və hərbi-siyasi məsələlərin öyrənilməsini təmin etməkdir. Xarici dil kurslarında hərbi qulluqçuların xarici dillərdə (tələbata görə) ünsiyyət bacarığının formalaşdırılması və vərdişlərinin təkmilləşdirilməsi həyata keçirilir.^[1]

Azərbaycan Respublikası Müdafiə Nazirliyinin Milli Müdafiə Universitetinin Hərbi İdarəetmə İnstitutunun nəzdində fəaliyyət göstərən Xarici dil mərkəzi 20 noyabr 2015-ci ildə təsis olunmuş, mərkəzin ilk kursu 18 yanvar 2016-cı ildə başlamış, 22 aprel 2016-cı ildə isə ilk məzunlarının buraxılış mərasimi keçirilmişdir.

Mərkəzin əsas missiyası hərbi qulluqçuların və gələcəkdə hərbi sahədə çalışacaq şəxslərin xarici dillər üzrə biliklərini artırmaq, onları beynəlxalq əməkdaşlıq sahəsində xarici dildən mükəmməl istifadəyə hazırlamaqdır.

Mərkəzdə başlıca dil ingilis dili olmaqla yanaşı qonşu ölkələrin dilləri (erməni, fars, gürcü, rus), eləcə də italyan və çin dilləri (ikitərəfli razılaşmalar çərçivəsində) tədris olunur. Proqramlar başlanğıc səviyyədən (A1) yüksək səviyyəyə (C1) qədər olan mərhələləri əhatə edir. Tədris planına danışıq, dinləmə, oxu və yazı bacarıqları ilə yanaşı, hərbi terminologiya və taktiki kommunikasiya da daxildir. Dinləyicilər üçün mədəni mübadilə və xaricdə təhsil imkanları da mövcuddur. Mərkəz müasir texnologiyalardan - interaktiv dil laboratoriyaları, multimedia vasitələri və onlayn platformalardan istifadə edir. Gələcək hədəflər arasında tədris dillərinin genişləndirilməsi, süni intellekt və VR texnologiyalarının tətbiqi, həmçinin beynəlxalq təcrübə mübadiləsinin artırılması yer alır.

Hazırda mərkəzə polkovnik Elman Məmmədov rəhbərlik edir.

Hərbi İdarəetmə İnstitutu nəzdində fəaliyyət göstərən Hərb Oyunları Mərkəzi Azərbaycan Ordusunun zabit və komandir heyətinin peşəkar hazırlığının təkmilləşdirilməsinə yönəlmiş müsir təlim-informasiya infrastrukturudur. Mərkəzin missiyası hərbi qulluqçuların komandirlik və idarəetmə bacarıqlarının inkişafına müasir texnologiyalar və kompüter əsaslı təlim metodları vasitəsilə dəstək göstərməkdən ibarətdir. Bu istiqamətdə Mərkəz fəaliyyətdə səmərəliliyin artırılmasını və yaradıcı, qərarlı, çevik düşüncəyə malik lider bir heyətin formalaşdırılmasına töhvə verməyi hədəfləyir .

Mərkəzin texnoloji imkanları taktiki və əməliyyat səviyyələrində bütün növ təlimlərin kompüter dəstəkli formatda keçirilməsini təmin edir. Müvafiq proqram təminatı vasitəsilə hərb oyunları planlaşdırılır, icra olunur və qiymətləndirilir, komandirlərin qərar qəbuletmə prosesləri real döyüş şəraitinə yaxınlaşdırılmış kompüter simulyasiyası əsasında modelləşdirilir. Təlimlərə cəlb olunan müxtəlif kateqoriyalı şəxsi heyətin fəaliyyəti, qərarları və ümumi təlim dinamikası sistemli şəkildə analiz olunur, nəticələrin daha informativ və obyektiv qiymətləndirilməsi təmin edilir. Bununla yanaşı, Mərkəzdə Azərbaycan Ordusunun, eləcə də müttəfiq dost və tərfdaş ölkələrin silahlı qüvvələri və aidiyyəti qurumları ilə əməkdaşlıq çərçivəsində təşkil edilən təlim, kurs, məşq və digər hazırlıq proqramları da müvafiq qaydalara uyğun olaraq planlaşdırılır və icra edilir.

Mərkəzə hazırda polkovnik Cəfərov İftixar rəhbərlik edir .

• Azərbaycan Respublikası Müdafiə Nazirliyi
• Milli Müdafiə Universiteti (Azərbaycan)