Kamilla Fikrət qızı Hüseynova (1 noyabr 1978, Bakı) — Azərbaycan balerinası və baletmeysteri, Azərbaycan Respublikasının xalq artisti (2012).
| Kamilla Hüseynova | |
|---|---|
| Doğum tarixi | 1 noyabr 1978 (47 yaş) |
| Doğum yeri | |
| Fəaliyyəti | balerina, baletmeyster, balet pedaqoqu[d] |
| Təhsili |
|
| Mükafatları |
  |
Kamilla Fikrət qızı Hüseynova 1978-ci ildə Bakı şəhərində anadan olmuşdur. 1988-ci ildə Bakı Xoreoqrafiya Məktəbinə daxil olmuşdur.[1] Burada o, Leyla Vəkilova, Tamilla Şirəliyeva, Olqa Arifulina, Pulumb Aqaliu və başqalarından dərslər almışdır.[2] 1996–2000-cı illərdə Qərb Universitetində təhsilini davam etdirmiş, iqtisad üzrə fəlsəfə doktoru elmi dərəcəsi almışdır.[1] 2010-cu ildə Moskvadakı Böyük Teatrda təcrübə keçmişdir.[3] Burada o, Nikolay Tsiskaridze və Lüdmila Semenyakadan dərslər almışdır.[2]
Kamilla Hüseynova 1994-cü ildən Azərbaycan Dövlət Akademik Opera və Balet Teatrının truppasına işə qəbul olunmuş, uzun illər burada səhnəyə qoyulmuş tamaşalarda bir sıra partiyaları ifa etmişdir.[1] Rusiya, Türkiyə, Fransa, Belarus və Çexiya kimi bir sıra xarici ölkələrin milli teatr səhnələrində çıxış etmişdir. Onun repertuarına Şəhrizad ("Min bir gecə"), Gözəllər gözəli ("Yeddi gözəl"), Tomris ("Rast"), Baycan ("Eşq və ölüm"), Zibeydə ("Şəhrizad"), Gülyanaq ("Qız qalası"), Leyli ("Leyli və Məcnun") və onlarla digər obraz daxil olmuşdur. 2016-cı ilin mayında "Şəhrizad" baletində Zibeydə rolunun ifası ilə səhnə çıxışlarını başa vurmuşdur. O, Azərbaycan Dövlət Akademik Opera və Balet Teatrının balet truppasının və Bakı Xoreoqrafiya Akademiyasının bədii rəhbəri vəzifələrində çalışmışdır.[4]
Azərbaycan Respublikası Prezidentinin müvafiq sərəncamları ilə Kamilla Hüseynovaya 16 may 2006-cı ildə "Əməkdar artist"[5], 9 may 2012-ci ildə isə "Xalq artisti" fəxri adları verilmişdir.[6] 2008–2023-cü illərdə ardıcıl olaraq prezident mükafatına layiq görülmüşdür.
Kamilla Hüseynova 2005-ci ildə Tamilla Şirəliyevanın quruluşunda Niyazinin simfonik muğamı əsasında "Rast" muğam-baletində ifasına görə Azərbaycan Teatr Xadimləri İttifaqının "Qızıl dərviş" mükafatına, 2008-ci ildə isə Qara Qarayevin "Yeddi gözəl" baletindəki ifasına görə Mədəniyyət Nazirliyinin "Zirvə" mükafatına layiq görülmüşdür.[2]
- ↑ 1 2 3 "Hüseynova Kamilla Fikrət qızı". Bakı Xoreoqrafiya Akademiyası. İstifadə tarixi: 14 yanvar 2026.
- ↑ 1 2 3 Elya Ənvərli. ""Karmen" kimi azadlığı sevən". Region Plus. 15 aprel 2016. İstifadə tarixi: 14 yanvar 2026.
- ↑ "Azərbaycanlı balerina Böyük Teatrda təcrübə keçir". Azərbaycan Dövlət İnformasiya Agentliyi. 19 oktyabr 2010. İstifadə tarixi: 14 yanvar 2026.
- ↑ "Xalq Artisti Kamilla Hüseynova səhnə ilə vidalaşır". Azərbaycan Dövlət İnformasiya Agentliyi. 5 may 2016. İstifadə tarixi: 14 yanvar 2026.
- ↑ "Azərbaycan Respublikasının mədəniyyət xadimlərinə fəxri adların verilməsi haqqında Azərbaycan Respublikası Prezidentinin Sərəncamı". Hüquqi aktların vahid elektron bazası. 16 may 2006. İstifadə tarixi: 14 yanvar 2026.
- ↑ "Azərbaycan Respublikasının mədəniyyət xadimlərinə fəxri adların verilməsi haqqında Azərbaycan Respublikası Prezidentinin Sərəncamı". Hüquqi aktların vahid elektron bazası. 9 may 2012. İstifadə tarixi: 14 yanvar 2026.