Mənsur Məmmədov (rəqqas)

Mənsur Məmmədov 2 aprel 1945-ci ildə Bakı şəhərində (keçmiş Pervomayski küçəsi, indiki Dilarə Əliyeva küçəsi) ziyalı ailəsində anadan olmuşdur. Onun ulu babasının evi hazırda da İçərişəhərdə tarixi bina kimi mövcuddur. ​Mənsur Məmmədovun kökləri Quba və Bakının qədim və hörmətli nəsillərinə dayanır. Babası Mirzə Ələkbər dövrünün tanınmış din xadimi, Əjdərbəy məscidinin şeyxi olmuşdur. O, həmçinin xalq təbabəti ilə məşğul olmuş, bitkilərdən dərmanlar hazırlayaraq insanları müalicə etmişdir. ​​Atası Eyyub Məmmədov peşəkar əczaçı olmuşdur. Anası isə 16 nömrəli poliklinikanın baş həkimi və kardioloq kimi çalışmışdır.

Bakı şəhəri 190 nömrəli tam orta məktəbdə təhsil almışdır. 1963–1964-cü illərdə 12 nömrəli Texniki Peşə məktəbində "Soyuducu qurğular mexaniki" ixtisası üzrə təhsil alıb. 1964–1965-ci illərdə Sovet Ordusu sıralarında həqiqi hərbi xidmətdə olmuşdur. 1968–1971-ci illərdə Bakı 8 nömrəli Tibb Məktəbində oxumuşdur. 1972-ci ildə Mirzəağa Əliyev adına Azərbaycan Dövlət İncəsənət İnstitutunun (hazırda ADMİU) Mədəni-maarif fakültəsinə daxil olmuş, 1977-ci ildə ali təhsilini başa vurmuşdur. Ali təhsilini bitirdikdən sonra təyinatla Naxçıvan Muxtar Respublikasına göndərilən Məmmədov, orada böyük ədib Cəlil Məmmədquluzadənin nəslindən olan xanımla ailə həyatı qurmuşdur. Onun bu nikahdan üç övladı (iki oğlan, bir qız) dünyaya gəlmişdir.

​Mənsur Məmmədovun karyerası həm tibb, həm də incəsənət sahələrini əhatə etmişdir. Əmək fəaliyyətinə Təcili Tibbi Yardım stansiyasında sanitar kimi başlamış, sonradan feldşer kimi fəaliyyətini davam etdirmişdir. 1970-ci ildə Azərbaycan Dövlət Filarmoniyasında işə başlamışdır. 1983-cü ildən etibarən isə Azərbaycan Dövlət Musiqili Komediya Teatrında (hazırda Dövlət Akademik Musiqili Teatrı) çalışmışdır. İncəsənətə olan marağı onu 1988-ci ildə Veteranlar Rəqs Kollektivinə gətirmiş və burada fəal iştirak etmişdir.

Mənsur Məmmədov Azərbaycan kino sənətində də yaddaqalan obrazlar yaratmış, kinosevərlərin hafizəsində xüsusilə "Bəyin oğurlanması", "Hər şey yaxşılığa doğru" və "Milli bomba" kimi filmlərdə canlandırdığı koloritli rolları ilə həkk olunmuşdur.^[1] Bundan əlavə, o, 2006–2008-ci illərdə rejissor Mirsadıq Ağazadənin "Space" televiziyasında yayımlanan məşhur "Kiçik Qala" verilişinin əsas iştirakçılarından biri olmuş, özünəməxsus tərzi və səmimiyyəti ilə tamaşaçıların sevimlisinə çevrilmişdir.

Mənsur Məmmədov 7 may 2017-ci ildə Bakı şəhərində vəfat etmişdir.

Mənsur Məmmədov "Əhməd haradadır?", "Vah!..", "Gümüşü furqon", "Bəyin oğurlanması", "Cin mikrorayonda", "Yaramaz", "Fransız", "Hər şey yaxşılığa doğru", "Yerlə göy arasında", "Milli bomba" və "Yoxlama" filmlərində rol almışdır.^[2]

O, həmçinin "Mozalan" satirik kinojurnalının bir çox bədii süjetlərində və qısametrajlı filmlərində (məs. "Yeganə əlac"^[⇨], "Yenilik") müxtəlif xarakterli obrazlar canlandırıb.

• "Rəqqas As", ("Kiçik Qala" verilişi)
• "Universal Mansur", ("Kiçik Qala" verilişi)
• "Bəyin oğurlanması" filmində Hidayət müəllimin şoferi kimdir? Mədəniyyət yazarı Vasif Ayanın "Şəxsi əşyalar" adlı müəllif layihəsinin qonağı kinorejissor, xalq artisti Vaqif Mustafayevdir, YouTube
• "Yeganə əlac", Mozalan, 1981, Vaqif Mustafayevin rəsmi YouTube kanalı