Mehmed Məmduh bəy
Mehmed Məmduh bəy (türk. Mehmed Memduh Bey; 1858, İstanbul – 1919, İstanbul) — Osmanlı dövlətinin son illərində mühüm vəzifələr tutan bürokrat, hakim və elmi xadim.
| Mehmed Məmduh bəy | |
|---|---|
| türk. Mehmed Memduh Bey | |
Osmanlı dövlətinin Ədliyyə naziri | |
| 31 oktyabr 1911 – 22 yanvar 1912 | |
| Əvvəlki | Ürgüplü Mustafa Əfəndi |
| Sonrakı | Hüseyn Hilmi Paşa |
| Şəxsi məlumatlar | |
| Doğum tarixi | |
| Doğum yeri | |
| Vəfat tarixi | |
| Vəfat yeri | |
| Təhsili | |
Mehmed Məmduh bəy 1858-ci ildə İstanbulda Mehmed Nüzhət Əfəndinin ailəsində dünyaya göz açıb.[1] İbtidai təhsilini, Kapitan İbrahim Paşa Rüştiyyəsi və Mahrec-i Əqləmdə alan Mehmed bəy, bu məktəbləri bitirdikdən sonra təhsilini Bəyazid məscidində ərəb və fars dillərində davam etdirib. 1882-ci ildən 1885-ci ilin fevralına qədər indiki İstanbul Universitetinin Hüquq fakültəsində təhsil alıb.
Məmur həyatına 21 noyabr 1874-cü ildə 16 yaşında Gömrük İdarəsinin qeydiyyat şöbəsində katib kimi başlayan Mehmed Məmduh bəy daha sonra, 22 avqust 1875-ci ildə Maliyyə Nazirliyinin gəlir uçotu şöbəsinə, 1 fevral 1876-cı ildə isə İcraiyyə Komitəsində katib vəzifəsinə təyin edilib.
26 aprel 1879-cu ildə Apelyasiya Məhkəməsinin Cinayət Kollegiyasında üçüncü dərəcəli məhkəmə katibi, 28 yanvar 1880-ci ildə İstanbul İttiham Məhkəməsində ikinci dərəcəli məhkəmə katibi vəzifələrində çalışdı. İstanbul Universitetinin Hüquq fakültəsində tələbə ikən 24 mart 1881-ci ildə Apelyasiya Məhkəməsinin Cinayət Kollegiyasında ikinci dərəcəli məhkəmə katibi təyin edildikdən sonra 13 fevral 1883-cü ildə İstanbul Apelyasiya Məhkəməsinə dövlət prokurorunun köməkçisi təyin edildi və beləliklə də, hüquq sahəsinə qədəm qoydu.
Uzun müddət bu vəzifədə çalışdıqdan sonra Üsküdar Birinci İnstansiya Məhkəməsində (10 noyabr 1894) və Dərsəadət Birinci İnstansiya Məhkəməsində (7 aprel 1895) prokuror vəzifəsində çalışmışdıqdan sonra, 17 fevral 1896-cı ildə Cinayət İşləri üzrə direktor təyin edildi. Bu vəzifədə olarkən 22 iyun 1900-cü ildə İstanbul Universitetinin Hüquq fakültəsində cinayət məhkəməsindən dərs deməyə başlamış və uzun illər çalışmışdır.
O, ardıcıl olaraq İstanbul Apelyasiya Məhkəməsinin prokuroru (14 aprel 1902), İstanbul Apelyasiya Məhkəməsinin Kommersiya Bölməsinin rəhbəri (24 oktyabr 1905), Kassasiya Məhkəməsinin üzvü (18 dekabr 1906), Kassasiya Məhkəməsinin Baş Dövlət prokuroru (15 avqust 1906) vəzifələrinə təyin edilmişdir. Bu təyinatlardan sonra 31 oktyabr 1911-ci ildən 22 yanvar 1912-ci ilə qədər Mehmed Səid Paşa kabinetində Ədliyyə naziri və Dövlət Şurasının sədri vəzifələrində çalışmışdır.
Mehmed Məmduh bəy, 2 noyabr 1904-cü ildə Təhsil Nazirliyi tərəfindən 537 nömrəli lisenziya ilə nəşr olunmuş "Tatbikat-ı Cezaiye" adlı iki cildlik əsərin müəllifidir.[2]
Mehmed Məmduh bəy 1919-cu ildə İstanbulda vəfat etmişdir.
- ↑ "1868'den 1922'ye Şura-yı Devlet Reisleri, Fethi Gedikli, Danıştay Web sitesi". 20 Şubat 2011 tarixində arxivləşdirilib. İstifadə tarixi: 20 Temmuz 2011.
- ↑ http://catalog.hathitrust.org/Record/008955657 (#bare_url_missing_title). 9 Mart 2016 tarixində arxivləşdirilib. İstifadə tarixi: 20 Temmuz 2011.