Portal:Azərbaycan mədəniyyəti/Bilirsinizmi/22

…Rəvayətə görə, Molla Pənah Vaqif Mədinə adlı qadınla eşq macərası yaşamışdır. Salman Mümtazın fikrincə, Vaqifin şeir poeziyasının müəyyən bir hissəsi Mədinəyə olan sevgiyə görə formalaşmışdır.
…Azərbaycanlıların daxil olduğu Qafqaz aşıqları yeni musiqilər bəstələməklə birlikdə qədim şeirləri də oxuyurdular. Georgi Qurciyevə görə, XIX əsrin sonunda bəzi aşıqlar Gilqameş dastanının bütöv hissələrini əzbərdən oxuya bilirdilər. Bu, 4500 illik şifahi ənənə ilə əlaqədən xəbər verir. Çünki orijinal Akkad mətnləri XX əsrin əvvəlinə kimi deşifrə edilməmişdi.
…Tarixçi Sara Aşurbəyli hesab edir ki, müsəlmanlıqdan əvvəlki dövrdə Şirvanşahlar saray kompleksinin divanxanasının olduğu ərazi müqəddəs yer olub. O güman edir ki, piyaləyəoxşar çuxurlar öldürülmüş heyvanların qanını saxlamaq üçün istifadə edilirdi.
…Elmira Şahtaxtinskayanın "Azərbaycan qədim mədəniyyət diyarıdır" plakat silsiləsində rəssam Sultan Məhəmmədə həsr edilmiş portret həmin rəssamın "Kitab oxuyan gənc oğlan" (şəkildə) miniatürünə sanki bir nəzirədir. Elmira Şahtaxtinskaya rəssamı onun öz əsərindəki vəziyyətdə təsvir edərək, rəssamın obrazının təsvirinə yox, onun yaradıcılıq dünyasındakı təsvirinə istiqamətlənmişdir. Rəsm tünd yaşıl fonda, Təbriz miniatür üslubunda verilmiş, Sultan Məhəmmədin gənc, ancaq müdrik olan təsviri yaradılmışdır.