Azərbaycan Sovet Ensiklopediyası — 10 cilddən ibarət Azərbaycan dilində ensiklopediya. Azərbaycan Sovet Ensiklopediyasının nəşrinə ilk dəfə 1930-cu illərdə cəhd edilmişdi. Həmin dövrdə Azərbaycan SSR Xalq Komissarları Soveti yanında Azərbaycan Şura Ensiklopediyası (AŞE) Komitəsi yaradılmış, İsmayıl İsmayılov komitəyə baş redaktor, Vəli Xuluflu isə elmi katib seçilmiş və 1935-ci ildə Azərbaycan Şura Ensiklopediyasının birinci cildinin lüğəti nəşr olunmuşdu. 1936-cı il martın 3-də Mir Cəfər Bağırov tərəfindən "Azərbaycan Şura Ensiklopediyasının nəşri haqqında" Azərbaycan KP Mərkəzi Komitəsinin qərarı imzalanmışdır. AŞE-nin nəşrinə dair materiallar SSRİ Elmlər Akademiyasının Azərbaycan Filialında Ruhulla Axundovun rəhbərliyi ilə hazırlanırdı. Onun şöbə müdirləri arasında Bəkir Çobanzadə, Əli Nazim, Mustafa Vəkilov, Müseyib Şahbazov, Hadı Əliyev, İsmayıl İsmayılov, habelə Üzeyir Hacıbəyov da var idi. Buna baxmayaraq, bir il sonra, 1937-ci ildə siyasi repressiyaların güclənməsi ilə layihə yarımçıq qalmışdı.
Azərbaycan Sovet Ensiklopediyasının nəşr edilməsi haqqında qərar Azərbaycan KP MK və Azərbaycan SSR Nazirlər Soveti tərəfindən 1965-ci il 30 dekabrda verilmişdir. Qərara əsasən, oncildlik "Azərbaycan Sovet Ensiklopediyası (ASE)" və "Azərbaycan SSR" xüsusi cildi (Azərbaycan və rus dillərində) buraxılmalı idi.