| İlham Məhərrəmov | |
|---|---|
 | |
| Vətəndaşlığı | Azərbaycan |
| Milliyyəti | Azərbaycanlı |
| İxtisası | İdman mütəxəssisi, sosial iş |
| Təhsili |
Bakı Humanitar Kolleci (2019) Sumqayıt Dövlət Universiteti (2023–) |
| Tanınır | Boccia idman növü üzrə məşqçi, Qarabağ müharibəsi qazisi, ictimai fəaliyyət |
| Mükafatları | “Tərəqqi” medalı (2019) |
İlham Nadir oğlu Məhərrəmov (1971, Şirvan, Azərbaycan SSR) — Qarabağ müharibəsi qazisi, Azərbaycanda boccia idmanının inkişafında mühüm rol oynamış idman mütəxəssisi və ictimai fəal. O, Azərbaycan Paralimpiya Komitəsində məşqçi, daha sonra Boccia İdman Federasiyasının baş katibi, hazırda isə federasiyanın vitse-prezidenti və baş məşqçisi kimi fəaliyyət göstərir. 2019-cu ildə “Tərəqqi” medalı ilə təltif edilmişdir.
İlham Məhərrəmov 1971-ci ildə Şirvan şəhərində anadan olmuşdur. 1978-ci ildə Şirvan şəhərində 13 nömrəli tam orta məktəbdə təhsil almağa başlamışdır. 1986-cı ildə 152 nömrəli peşə məktəbinə daxil olaraq radio-aparatçılıq ixtisası üzrə təhsil almışdır. 1989–1991-ci illərdə Sovet İttifaqının Daxili Qoşunlarında Moldova ərazisində yerləşən hərbi hissədə xidmət etmişdir.
1992-ci ildə Qarabağ müharibəsi zamanı könüllü olaraq döyüşlərə qatılmış, Kəlbəcər–Ağdərə istiqamətində gedən əməliyyatlarda iştirak etmişdir. 1994-cü il 11 yanvar tarixində Ağdərə istiqamətində gedən döyüşlərdən birində ağır yaralanmış və sonradan Qarabağ müharibəsi qazisi statusu verilmişdir.
Məhərrəmov 1996-cı ildə Paralimpiya Hərəkatına qoşularaq kamandan oxatma idman növü ilə məşğul olmuş və Azərbaycan çempionu adını qazanmışdır.
Müalicə dövründə bir müddət Krımda yaşamış, 2013-cü ildə Azərbaycana qayıtmışdır.
2014-cü ildə Azərbaycan Paralimpiya Komitəsində boccia üzrə məşqçi və Sosial Xidmətlər Agentliyinin Peşə-əmək Reabilitasiyası Mərkəzi üzrə kurator təyin edilmişdir.[1]
2018-ci ildə Boccia İdman Federasiyasına baş katib təyin olunmuşdur. Hazırda federasiyanın vitse-prezidenti və baş məşqçisi kimi fəaliyyət göstərir.
Onun rəhbərliyi ilə Azərbaycanda 10-dan çox boccia çempionatı təşkil edilmiş, fiziki məhdudiyyətli şəxslərin idmana cəlb olunmasına şərait yaradılmışdır.[2]
2014-cü ildə fiziki imkanları məhdud şəxslərin sosial problemlərini işıqlandırmaq məqsədilə **ARABAÇI TV** onlayn platformasını yaratmışdır.
2015-ci ildə Bakıda keçirilən Avropa Oyunlarında əlil arabasından istifadə edən şəxslərin ilk dəfə könüllü kimi fəaliyyətinə cəlb olunması təşəbbüsünün müəllifi olmuş və 30 nəfərlik qrupun rəhbəri olmuşdur. O, həmçinin Formula 1 yarışları və 2017-ci il İslam Həmrəyliyi Oyunları zamanı təlimçi kimi iştirak etmişdir.
2016-cı ildə **“Arabaçı Əlillər Şəbəkəsi” İctimai Birliyi**ni təsis etmiş və sosial layihələrə rəhbərlik etmişdir. 2019–2021-ci illərdə pandemiya dövründə aztəminatlı və fiziki imkanları məhdud şəxslərə yardım kampaniyalarının təşkilində iştirak etmişdir.
- “Tərəqqi” medalı — 2019.
- ↑ "Azərbaycanda yeni idman federasiyası yaradıldı". sportfm.az. İstifadə tarixi: 1 fevral 2025.
- ↑ "İlham Məhərrəmov: Los-Ancelesdə keçiriləcək Paralimpiya Oyunlarına boccia üzrə ən azı üç lisenziya qazanacağımızı gözləyirik". AZƏRTAC. 2024. İstifadə tarixi: 1 fevral 2025.