Qul ticarəti (film)

Tailandda fəaliyyət göstərən RTP (Tailand Kral Polisi) detektivi Toni Vitayakul insan alverçilərini guya "tailandlı qız almaq" adı ilə gizli əməliyyat zamanı zərərsizləşdirir. O, qaçırılan qızların daşınması üçün istifadə olunan gəmi və onun təyinatı barədə məlumat əldə edir və öyrənir ki, serb mafiozu Viktor Draqoviç həmin yükü qəbul etmək üçün orada olacaq.

Bu vaxt Nyu-Cersi ştatının Nyuark şəhərində NPD (Nyuark Polis Departamenti) detektivi Nik Kessidi Draqoviçin ABŞ-də olduğunu müəyyən edir. Kessidi və onun rəisi kapitan Kostello polis qrupunu Draqoviç haqqında məlumatlandıraraq bildirirlər ki, o, qlobal insan alveri şəbəkəsinin əsas fiqurlarından biridir. Draqoviçin konteynerini daşıyan gəmi ABŞ sahillərinə yaxınlaşdıqda Kessidi və qrup üzvləri onu limanda ələ keçirməyə hazırlaşırlar. Gəmi limana çatdıqda Draqoviç daşınma zamanı qadınların öldüyünü görür. O, gəminin kapitanını bu işə görə məsul hesab edərək onu işgəncə ilə öldürtdürür. Polis müdaxilə edərkən atışma baş verir; Kessidi özünümüdafiə məqsədilə Draqoviçin ən kiçik oğlu Andreyi öldürür və Draqoviç həbs olunur.

Həbsdə olduğu müddətdə Draqoviç Kessidinin ailəsinə hücum təşkil edir; hücum nəticəsində detektivin həyat yoldaşı və qızı Sofiya öldürülür, lakin Kessidi sağ qalır. Xəstəxanada onu kapitan Kostello və FBI agenti Rid ziyarət edir və bildirirlər ki, Draqoviç ABŞ-dən qaçmışdır. Onlar ayrıldıqdan sonra Kessidi gizlicə xəstəxananı tərk edir, bunun üçün paltar və sakitləşdirici opioid preparatı götürür. Daha sonra silahlarını əldə edərək Draqoviçin vəkilinin fəaliyyət göstərdiyi restorana gedir. Vəkili Draqoviçin yerini deməyə məcbur etdikdən sonra onu güllələyir və restoranı partladır. Bu vaxt Kambocada senator Hat Draqoviçi xəbərdar edir ki, dərhal ölkəni tərk etməsə, o, həbs olunacaq və ABŞ-yə ekstradisiya ediləcək. Draqoviç senatoru şantaj edərək işlərini qaydaya salmaq və ölkədən qaçmaq üçün ona iki həftə vaxt verilməsinə nail olur.

Kessidi Draqoviçin izinə düşmək üçün Tailandda axtarışa başlayır. ABŞ hakimiyyət orqanları onun əsəb pozuntusu keçirdiyini düşünərək Ridi onu həbs etmək üçün göndərir. Vitayakul və onun tərəfdaşı Nunqa Ridə kömək etmək tapşırığı verilir. Suvarnabhumi aeroportunda Kessidi polis nəzarətindən yayınır. Draqoviç tərəfindən rüşvətlə ələ alınmış Rid Nunqu öldürür və hadisəni Kessidinin üzərinə atır. Vitayakul Kessidini küçələrdə təqib edir, lakin onu tuta bilmir. Kessidi Poipetdəki gecə klubuna çatır; Draqoviçin adamlarından birini işgəncə yolu ilə dindirərək onun yerləşdiyi məkanı öyrənir. Vitayakul və Rid kluba gələrək Kessidini həbs etməyə çalışır, lakin baş verən döyüşdən sonra Kessidi bir daha qaçmağa nail olur. Rid Vitayakulun telefonuna gələn zəngin vaxtına əsaslanaraq məlumatçı şəxsin kimliyini müəyyən edir – bu Vitayakulun sevgilisi Min idi.

Kessidi bu arada Draqoviçin Cənub-Şərqi Asiyada insan alveri biznesinə nəzarət edən qeyri-qanuni oğlu Yankonu tapmağa çalışır. Anbar ərazisində baş verən atışma zamanı Kessidi Yankonun adamları ilə döyüşür. Yanko qaçır, lakin daha sonra onun ögey qardaşları İvan və Qoran Draqoviç tərəfindən öldürülür. Vitayakul tərəfdaşının ölümünün əsl səbəbini öyrənərək Ridi öldürür. Yanko ölməzdən əvvəl atasının yerini açıqlayır.

Növbəti gün Kessidi və Vitayakul birlikdə Draqoviçin kompleksinə hücum edirlər. İvan Mini girov götürür, lakin Vitayakul onu öldürür. Kessidi raket buraxıcı qurğu vasitəsilə bir avtomobili məhv edir və nəticədə Draqoviçin helikopteri onsuz havaya qalxır. Ardınca baş verən atışmada Vitayakul Qoranı öldürür. Daha sonra Kessidi Draqoviçlə üz-üzə qalaraq onun ikinci helikopteri ələ keçirməsinə baxmayaraq onu bıçaqlayaraq öldürür. Ölümündən əvvəl Draqoviç Kessidiyə Sofiyanın sağ olduğunu və insan alveri şəbəkəsinə satıldığını bildirir. Draqoviç ölür, Kessidi isə qızının taleyini öyrənə bilmədiyi üçün sarsılır.

Hadisələrdən sonra Kessidi Vitayakul və Min ilə vidalaşır, onlara Sofiyanın şəklini verərək onu tapana qədər saxlamalarını xahiş edir. Daha sonra Kessidi Sofiyanı tapmaq üçün təkbaşına yola düşür.

• Dolf Lundqren — Nik Kessidi
• Toni Caa — Toni
• Ron Perlman — Viktor Draqoviç
• Maykl Cey Vayt — Uayt Rid
• Piter Ueller — Kostello
• Keri-Hiroyuki Taqava — Senator Hat
• Selina Ceyd — Min
• Konan Stivens — İqor
• Mayk Dopud — Qoran
• Patrik Sabunquy — Detektiv Rassel
• Tasya Teles — Roza Kessidi, Nikin həyat yoldaşı^[10][11]

• Qul ticarəti Box Office Mojo-da
• Qul ticarəti — Internet Movie Database saytında

• Skin Trade at Magnolia Pictures
• Skin Trade at Metacritic
• Skin Trade at The Numbers
• Qul ticarəti (film) Rotten Tomatoes saytında  (ing.)