Sapporo saat qülləsi

Sapporo saat qülləsi 1878-ci ildə tikilmişdir. Yaponiyanın qədim saat qülləsi hesab olunur. Hyoqo prefekturasında yerləşən Şinkoro qülləsi daha qədim tikili olsa da, saat qülləsi kimi istifadəsi növbəti illərə təsadüf edir.^[1] Tikili Sapporo Kənd Təsərrüfatı Kollecinin idman və məşq zalı kimi nəzərdə tutularaq inşa olunmuş, tikintisi 16 oktyabr 1878-ci ildə başa çatmışdır. Burada qəbul və məzuniyyət tədbirləri baş keçirilirdi. Kollec amerikalılar tərəfindən qurulduğu üçün saat qülləsi 1881-ci ilin iyulunda Boston şəhərinin "E. Howard & Co" saat şirkəti tərəfindən quraşdırılmışdır.^[2]

Tikili 1903-cü ildə Sapporo şəhərinin rəhbərliyi tərəfindən satın alınmış, yol tikintisi səbəbilə 1906-cı ildə hazırda yerləşdiyi yerə köçürülmüşdür. 1907-ci ildə müvəqqəti olaraq poçt və teleqraf idarəsi, 1911-ci ildə Hokkaydo Təhsil Şurası tərəfindən kitabxana kimi istifadə olunmuşdur. 1933-cü ildə saat qülləsində bərpa işləri aparılmışdır. 1950-ci ildə Sapporo Şəhər Kitabxanasına çevrilmişdir. 1961-ci ildə Sapporo şəhərinin mədəni mülkü, 1970-ci ildə Milli Əhəmiyyətli Mədəni Mülk elan olunmuşdur. 18 dekabr 1976-cı ildə ikinci mərtəbəsi Sapporo Tarix Muzeyi kimi istifadəyə verilmişdir. 25 yanvar 1978-ci ildə bütün tikili Sapporo Tarix Muzeyi kimi fəaliyyət göstərməyə başlamışdır. 1998-ci ildə saat qülləsinin bərpa işləri tamamlanmışdır.^[2]

Sapporo saat qülləsi muzey və tədbir zalı kimi istifadə olunur. Saat qülləsinin zəng səsləri 1996-cı ildə "Yaponiyanın 100 səs mənzərəsi"ndən biri seçilmişdir. Amerikan üslubunda olması, yaşı və zəng səsləri səbəbilə Sapporo saat qülləsi Hokkaydonun və Sapporonun simvollarından biri hesab olunur. Lakin tikilinin çox da hündür olmaması bura gələn turistlərin təəccüblənməsinə səbəb olur. Bu səbəbdən Sapporo saat qülləsi "Yaponiyanın ən məyusedici 3 görməli yeri"ndən biri adlandırılır.^[1]