Tovuz şəhər stadionu

Tovuz şəhər stadionu — Azərbaycanın Tovuz şəhərində stadion. Turan Tovuz ev oyunlarını bu stadionda keçirir.^[1]

Tovuz şəhər stadionu
Yeri	Tovuz
Açılış tarixi	5 sentyabr 1979
Tamaşaçı tutumu	6.500
Ev sahibi komanda	Turan Tovuz FK

1979-cu ilin sentyabr ayının 5-də Tovuz şəhər stadionu istifadəyə verilib. Həmin gün "Məhsul" ilə "Neftçi" komandası arasında yoldaşlıq görüşü keçirilib. 1981-ci ildə stadionda əsaslı təmir işləri aparıldıqdan sonra areanın açılış mərasimi keçirilib.

1992-ci ildə "Turan" komandasının yaradıcısı Vidadi Əhmədov komandanı gücləndirməklə yanaşı Mərkəzi stadiondada tikinti-quraşdırma işlərini həyata keçirib. Həmin dövrdə ilk dəfə olaraq drinaj sistemi düzəldildi və tribunanın üstü örtüldü. 2004-cü ildə Tahir Yusifovun rəhbərliyi dövründə dövlətin maliyyə dəstəyi ilə stadion ərazisində tikintisi yarımçıq qalmış baza istifadəyə verildi və stadionda yenidənqurma işləri aparıldı. Tribunalara 6500 ədəd oturacaq quraşdırıldı.^[2]

AFFA-nın İcraiyyə Komitəsinin 4 mart 2019-cu il tarixində keçirilən iclasında Tovuz rayonunda, “Turan Tovuz” klubunun nəzdində futbol akademiyasının təsis edilməsi və inşa olunması qərara alınıb. 2020-ci ildə FIFA və UEFA-nın maliyyə dəstəyi ilə AFFA tərəfindən inşa olunan akademiyanın tikintisi başa çatdırılıb.

17 yanvar 2021-ci ildə Tovuz şəhərində “Turan Tovuz” klubunun nəzdindəki futbol akademiyasının açılış mərasimi keçirilib. Tədbirdə AFFA-nın prezidenti Rövnəq Abdullayev, Tovuz Rayon İcra Hakimiyyətinin başçısı Məmməd Məmmədov, AFFA rəsmiləri və idman ictimaiyyətinin nümayəndələri iştirak ediblər.

Akademiyanın ərazisində inzibati binalar, dörd futbol meydançası tikilmiş və sair işlər görülmüşdür:

AKADEMİYA

• Akademiya otaqları: 11 otaq - 70 nəfərlik

• Əsas komanda üçün otaqlar: 16 otaq - 30 nəfərlik

• 2 restoran, 2 mətbəx

• Fitnes, sauna, paltardəyişmə otağı

• Həkim otağı

• İclas otağı

• 11 nəfərlik ofis otağı

• Camaşırxana

• Texniki və xidməti otaqlar

• 4 mini meydança (1 ədədi qapalı)

STADİON

• 4 paltardəyişmə otağı

• Mətbuat konfransı otağı

• Media iş otağı

• Tibb otağı

• Dopinq-nəzarət otağı

• Nümayəndə otağı

• Hakim otağı

• 2 Sky-Box

• Texniki otaqlar

TEXNİKİ

• Yarımstansiya

• Qazanxana

• Nasosxana

• Su rezervuarları

• Mərkəzi havalandırma