Turan Daşdəmirov

Turan Daşdəmirov 8 dekabr 2007-ci ildə Bakı şəhərində anadan olub. 2016-cı ildə AHİTA İdman Klubunda Akif Əliyevin rəhbərliyi altında güləşlə məşğul olmağa başlayıb.

Hazırda Azərbaycan İdman Akademiyasında təhsil alır.

Turan Daşdəmirovun beynəlxalq arenada debütü 2021-ci ilin 27–30 mayında Bolqarıstanda baş tutan 15 yaşlılar arasında Avropa Çempionatına təsadüf edib. Daşdəmirov 1/8 final mərhələsində macarıstanlı Mozes Laszloya 10:1, 1/4 final mərhələsində bolqarıstanlı Dimitar Dimitrova 9:0, yarım-final mərhələsində isə ermənistanlı Yuri Mxitaryana 10:4 hesabları ilə qalib gəldi və final görüşünə vəsiqə qazandı. Həlledici görüşdə Turan Daşdəmirov rusiyalı Rüstəm Abatsiyevə məğlub oldu (4:15) və U15 Avropa Çempionatını gümüş medalla başa vurdu.^[2]

2022-ci ildə U15 Azərbaycan Çempionatının qalibi olan Turan Daşdəmirov həmin ilin 16–20 iyulunda Zaqreb şəhərində (Xorvatiya) baş tutan 15 yaşlılar arasında Avropa Çempionatında qüvvəsini sınadı. Turnirdə Daşdəmirov əvvəlcə gürcüstanlı Simoni Basiliyaya 5:0, ardınca türkiyəli Abdulsamet Ucara 10:0 hesabları ilə qalib gəldi və yarım-final mərhələsinə adladı. Finala gedən yolda o, rumıniyalı Luis Mihai Vladdan üstün oldu və final görüşünə vəsiqə qazandı. Keçən il analoji turnirin həlledici görüşündə məğlub olan Turan Daşdəmirov bu səfər çempionluğa iddialı idi. Final görüşündə onun rəqibi ötən il analoji turnirdə qalib gəldiyi ermənistanlı Yuri Mxitaryan oldu. Bu görüşdə də Turan Daşdəmirov rəqibindən üstün oldu (8:2) və 15 yaşlılar arasında Avropa Çempionatının qızıl medalına sahib oldu.^[3]

Daşdəmirov 2023-cü ilin aprelində U17 Azərbaycan Çempionatında bütün rəqibləri üzərində qələbə qazanaraq turnirin qızıl medalına sahib oldu.^[4] Həmçinin o, Antalya şəhərində beynəlxalq "Zafer Kupası" turnirinin də çempionu oldu.^[5] Bundan sonra Daşdəmirov U17 Azərbaycan yığmasının heyətinə cəlb edildi və 12–18 iyunda Albaniyanın Tirana şəhərində baş tutan 17 yaşlılar arasında Avropa Çempionatında çıxış etdi. Daşdəmirov bir-birinin ardınca yunanıstanlı Atanasios Tsiniasa 9:0, gürcüstanlı Jaba Bolxvadzeyə 9:1, ermənistanlı Yuri Mxitaryana isə 8:0 hesabları ilə qalib gəldi və turnirin final görüşünə vəsiqə qazandı. Həlledici görüşdə onun rəqibi – 2 il əvvəl U15 Avropa Çempionatının finalında məğlub olduğu rusiyalı Rüstəm Abatsiyev idi. Revanş arzusunda olan Daşdəmirov rəqibi üzərində 7:4 hesabı ilə qələbə qazanaraq buna nail oldu və U17 Avropa Çempionatını qızıl medalla başa vurdu.^[6] İlin əsas turniri 31 iyul-6 avqustda İstanbul şəhərində baş tutan U17 Dünya Çempionatı oldu. Son qitə çempionatının qalibi Daşdəmirov bu turnirdə də çempionluğa iddialı idi. O, bir-birinin ardınca yaponiyalı Kaysei Yamamotoya 10:0, qırğızıstanlı Qədirbəy Almanbetova 9:1 və iranlı Alireza Əhmədə 5:1 hesabları ilə qalib gəldi və turnirin həlledici görüşünə vəsiqə qazandı. Finalda onun rəqibi – bir ay əvvəl U17 Avropa Çempionatında qalib gəldiyi rusiyalı Rüstəm Abatsiyev idi. Bu səfər də görüş gərgin idman mübarizəsi şəraitində baş tutdu (4:4), nəticədə Turan Daşdəmirov görüşdən qalib ayrılaraq 17 yaşlılar arasında dünya çempionu oldu.^[7] Turan Daşdəmirov 15 yaşında həm U17 Avropa, həm də U17 Dünya Çempionatlarının qalibi olmuşdu.

2024-cü ildə də Daşdəmirov 17 yaşlılar arasında beynəlxalq turnirlərdə çıxış etdi. Həmin il o, növbəti dəfə U17 Azərbaycan Çempionatının da qalibi oldu. 2024-cü ildə onun birinci ciddi sınağı 24–30 iyunda Serbiyanın Belqrad şəhərində baş tutan U17 Avropa Çempionatı idi. Titulunu qorumağı hədəfləyən Daşdəmirov təsnifat mərhələsində rusiyalı Baragatullo İsoyevə 8:0, 1/8 final mərhələsində yunanıstanlı Sotirios Ntontosa 11:2, 1/4 final mərhələsində ukraynalı Maqusd Sultanova 7:4, 1/2 final mərhələsində isə gürcüstanlı Niha Tsetsxladzeyə 3:0 hesabları ilə qalib gəldi və final görüşünə vəsiqə qazandı. Həlledici görüşdə onun rəqibi bundan əvvəl üç dəfə məğlub etdiyi ermənistanlı Yuri Mxitaryan oldu. Final görüşündə Turan Daşdəmirov rəqibi üzərində 1:38 dəqiqə ərzində 8:0 hesabı ilə inamlı qələbə qazandı və ardıcıl 2-ci dəfə U17 Avropa Çempionatının qalibi oldu.^[8] İlin əsas turniri isə 18–25 avqustda İordaniyanın Amman şəhərində baş tutan U17 Dünya Çempionatı oldu. U17 yaş qrupunda məğlubedilməz irəlləyən Daşdəmirov titulunu qorumağa iddialı idi. Daşdəmirov bir-birinin ardınca hindistanlı Sainat Pardi (5:1), ABŞ-li Domenic Munaretto (9:0) və qazaxıstanlı Yerassil Mussan (4:1) üzərində qələbələr qazanaraq final görüşünə vəsiqə qazandı. Həlledici görüşdə onun rəqibi qırğızıstanlı Kutman Kalbayev oldu. Gərgin idman mübarizəsi şəraitində baş tutan görüşdə Turan Daşdəmirov rəqibinə 5:3 hesabı ilə qalib gəldi və ardıcıl 2-ci dəfə 17 yaşlılar arasında Dünya Çempionatının qalibi oldu.^[9] Bununla da Daşdəmirov 2023–2024-cü illər ərzində dörd beynəlxalq turniri məğlubiyyətsiz başa vurdu (17 qələbə — 0 məğlubiyyət). Həmin il o, həm də Bəhreynin Manama şəhərində ISF Gimnaziada İdman Oyunlarını bürünc medalla başa vurd,^[10] U20 Azərbaycan Çempionatının isə qaibi oldu. 10 aprel 2024-cü ildə Gənclər və İdman Nazirliyi tərəfindən idman ustası dərəcəsi verilib.

2025-ci ildən etibarə Turan Daşdəmirov 20 yaşlıların beynəlxalq turnirlərində çıxış etməyə başladı. Daşdəmirovun bu yaş qrupunda birinci sınağı 30 iyun-6 iyulda İtaliyada baş tutan U20 Avropa Çempionatı oldu. Təsnifat mərhələsində gürcüstanlı Koba Karumidze (4:4), 1/4 final mərhələsində ermənistanlı Levon Qazaryan (1:1) və 1/2 final mərhələsində ukraynalı Nazari Babinsidən (3:1) üstün olan Daşdəmirov turnirin final görüşünə vəsiqə qazandı. Bu görüşdə onun rəqibi rusiyalı İvan Solomin oldu. Gərgin idman mübarizəsi şəraitində baş tutan görüşdə Daşdəmirov rəqibinə məğlub oldu (1:1) və U20 Avropa Çempionatını gümüş medalla başa vurdu.^[11] Daşdəmirov ardınca 17–24 avqustda Bolqarıstanda U20 Dünya Çempionatında qüvvəsini sınadı. 1/8 final mərhələsində hindistanlı Ani Mora (9:9), 1/4 final mərhələsində ukraynalı Nazari Babinsiyə (10:0), 1/2 final mərhələsində isə yaponiyalı Daysuhe Morişitaya (10:2) qalib gələn Daşdəmirov final görüşünə vəsiqə qazandı. Həlledici görüşdə Daşdəmirov iranlı Payam Farzad Əhmədi ilə üz-üzə gəldi. Gərgin idman mübarizəsi şəraitində baş tutan görüşdə Turan Daşdəmirov rəqibinə 3:5 hesabı ilə məğlub oldu və qitə çempionatından sonra U20 Dünya Çempionatını da gümüş medalla tamamladı.^[12]