Vaqif Nağıyev

Vaqif Nağıyev 20 aprel 1941-ci ildə Azərbaycan SSR-nın Lənkəran şəhərində ziyalı ailədə anadan olmuşdur. İlk təhsilini Lənkəranda, orta təhsilini isə Bakı şəhərində yerləşən 132 saylı tam orta məktəbdə almışdır. 1963-cü ildə Azərbaycan Sənaye İnstitutunu elektromexanik-mühəndis ixtisası üzrə bitirdikdən sonra bir ilə yaxın Azərbaycan SSR Elmlər Akademiyasında işləmişdir. Daha sonra Moskva şəhərinə gedən Nağıyev 1965-ci ildə yarımkeçiricilərlə bağlı namizədlik dissertasiyası müdafiə edir, Moskva Aviasiya Texnologiya İnstitutunda radioelektron aparatların istehsalı texnologiyası kafedrasında işləyir.

1986-cı ildə kosmosda istifadə olunmaq üçün tibbi diaqnostik aparatların hazırlanma texnologiyası ilə məşğul olmağa başlayır. Məhz bu texniki qrupa daxil olduqdan sonra Vaqif Nağıyevlə bütün əlaqələr kəsilir. Gənc alim SSRİ Dövlət Təhlükəsizlik Komitəsinin xüsusi nəzarəti altında calışmağa başlayır.

SSRİ Səhiyyə Nazirliyinin tibbi texnika üzrə Ümumittifaq Elmi Tədqiqat Sınaq İnstitutunda ultrasəs diaqnostik tibbi aparatların hazırlanması və koordinasiyası şöbəsinin müdiri və həm də SSRİ Səhiyyə Nazirliyində bu sahənin rəhbəri vəzifəsinə yüksəlir. Qısa zamanda 5 monoqrafiyanın, 23 ixtiranın, 200-dən artıq elmi məqalənin müəllifi olur. Yorulmaz təqdiqatçı apardığı tədqiqatlar dövlət əhəmiyyətli olduğu üçün yaxınlarının onunla əlaqəsi tamamilə kəsilir. Vaqif Nağıyev uğurlu təqdiqatçı alim kimi tezliklə texnika elmləri doktoru, professor adını alır. 1986-cı ildə Vaqif Nağıyev SSRİ Elmlər Akademiyasının və SSRİ Tibbi-Texniki Elmlər Akademiyasının akademiki adını alır. Elə həmin il ona tibb xidməti general-mayoru rütbəsi verilir.

Vaqif Nağıyev həm də SSRİ Müdafiə Nazirliyində kosmosda diaqnostik tədqiqatlarla bağlı mühüm vəzifə daşıyırdı.

Ultrasəs vazolokator, elektron qurğularının termoelektrik sərinləşdirilməsi, inteqral sxemlərin tədqiqi və sınağı üçün termoelektrik cihazlar, allergiyalı dermotozların müalicə üsulları və ultrasəs texnologiyalarının perspektiv inkişafı ilə bağlı tədqiqatlar aparır. Tədqiqatlarının əsas yönümü kosmosla bağlı olur.

Vaqif Nağıyev 1988-ci ildə İtaliyaya elmi təqdiqat işləri üçün yollanır. Xüsusi qoruma altında bu tədqiqatları həyata keçirən alim tez-tez İtaliyada səfərlərdə olur. Gənc alimin ölümü də vaxtsız olur. 1992-ci ildə Romaya ucmağa hazırlaşan alim təyyarədə özünü pis hiss edir. Ona iynə vurulur və bir neçə dəqiqə sonra Vaqif Nağıyev vəfat edir. Alimin ürək tutumasından dünyasını dəyişdiyi bildirilsə də, sonralar onun erməni tibb bacısı tərəfindən zəhərləndiyi məlum olur. Moskva şəhərində yerləşən Fəxri Xiyabanda dəfn edilməli olan akademik qohumları tərəfindən Bakı şəhərinə gətirilmiş və Yasamal məzarlığında dəfn edilmişdir. ^[1][2][3]