Ərəb dünyası–Nasist Almaniyası münasibətləri — 1933–1945-ci illərdə Adolf Hitlerin rəhbərlik etdiyi nasist Almaniyası ilə ərəb ölkələri və ərəb icmaları arasında formalaşmış siyasi, ideoloji və praktiki əlaqələr sistemi. Bu münasibətlər bir tərəfdən nasist rejiminin imperialist və antisemit ideologiyası, digər tərəfdən isə ərəb dünyasının müstəmləkəçilik əleyhinə hərəkatları, milliyyətçi çağırışları və regional ambisiyaları fonunda inkişaf etmişdir. Sözügedən münasibətlər laqeydlik, qorxu, düşmənçilik, qarşıdurma və kollaborsionizmdən ibarət geniş bir spektrdə dəyişirdi. Qarşıdurma baxımından, ərəb intellektual elitası nasizmi totalitar, irqçi, antisemit və imperialist bir fenomen kimi qəbul etmiş, ona çox tənqidi yanaşırdı. Nasizm həm liberallar, həm də marksistlər və solçu milliyyətçilər tərəfindən imperializmin başqa bir forması kimi qınanırdı.
