Xankəndi Dəmir Yolu və Avtovağzal Kompleksi

Ağdam-Xankəndi dəmir yolu xətti ilk dəfə 1979-cu ildə Heydər Əliyevin təşəbbüsü və rəhbərliyi ilə inşa edilmişdir. Bu dəmir yolunun istifadəyə verilməsi Qarabağ bölgəsinin sosial-iqtisadi və mədəni inkişafına mühüm təsir göstərmişdir.^[1]

Kompleksin təməlqoyma mərasimi 3 iyul 2025-ci ildə Azərbaycan Respublikasının Prezidenti İlham Əliyevin iştirakı ilə keçirilmişdir.^[1][2]

Layihənin icra müddəti 2025–2026-cı illəri əhatə edir.

Kompleks "Ağdam–Xankəndi dəmir yolu" layihəsinin tərkib hissəsidir. Bu dəmir yolu xətti Bərdə-Ağdam dəmir yolunun davamını təşkil edir və ümumi uzunluğu 28 kilometr, yan yollarla birlikdə isə 34,7 kilometrdir.^[1] Layihə çərçivəsində 4 körpünün, 5 yolötürücünün, 3 piyada keçidinin və 2 suötürücü borunun tikintisi nəzərdə tutulmuşdur.^[2]

Dəmir yolu xətti boyunca üç stansiya — Əsgəran stansiyası, Xocalı stansiyası və Xankəndi Dəmir Yolu və Avtovağzal Kompleksi inşa olunacaq.^[1]

Kompleksin layihələndirilməsi 2025-ci ildə başlamışdır. Tikinti sahəsi 6,4 hektardır. Kompleks beş mərtəbədən ibarət olacaq və onun ərazisində iki dəmir yolu platformasının, habelə 12 avtobus dayanacağının inşası planlaşdırılır.^[2] Kompleksin binasında gözləmə zalı, bilet kassaları, tibb məntəqəsi, ana və uşaq otağı, mağazalar, restoranlar, inzibati və toplantı otaqları, uşaq əyləncə mərkəzi, açıq terras və istirahət zonaları nəzərdə tutulmuşdur.^[1]

Dəmir yolu bölməsi gündəlik 800-1000 sərnişinə, avtovağzal isə 1000-1200 sərnişinə xidmət göstərəcək.^[2] Kompleks Qarabağ regionunda inşa ediləcək yeni nəqliyyat infrastrukturunun əsas elementlərindən biri olacaq.