Rəşad Sahil oğlu İsmayılov (27 avqust 1979) — Azərbaycan Respublikasının ekologiya və təbii sərvətlər naziri (2026-cı ildən).
| Rəşad İsmayılov | |
|---|---|
Vəzifədədir | |
| 10 fevral 2026-cı ildən | |
| Əvvəlki | Muxtar Babayev |
| 15 avqust 2024 – 10 fevral 2026 | |
| Nazir | Muxtar Babayev |
| Şəxsi məlumatlar | |
| Doğum tarixi | 27 avqust 1979 (46 yaş) |
| Təhsili | |
Rəşad Sahil oğlu İsmayılov 27 avqust 1979-cu ildə anadan olmuşdur. Bakı Dövlət Universitetinin Hüquq fakültəsi üzrə bakalavr və magistr pillələrini bitirmişdir.[1]
Rəşad İsmayılov əmək fəaliyyətinə 2000-ci ildə "Zəhmət" kiçik müəssisəsində hüquqşünas kimi başlamışdır. 2005–2006-cı illərdə "Star LTD" MMC-də hüquqşünas vəzifəsində, 2006-cı ildə Azərbaycan Respublikası Auditorlar Palatasının Gəncə Şəhər auditor təşkilatında hüquqşünas-mütəxəssis vəzifəsində işləmişdir.[1]
2006–2009-cu illərdə Daşınmaz Əmlakın Dövlət Reyestri Xidmətinin Bakı Şəhər Ərazi İdarəsinin hüquq şöbəsində hüquq məsləhətçisi və böyük hüquq məsləhətçisi vəzifələrində çalışmış, 2009-cu ildə Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidmətinin Bakı Şəhər Ərazi İdarəsinin Hüquq şöbəsində böyük hüquq məsləhətçisi olmuşdur.[1]
Rəşad İsmayılov 2010–2012-ci illərdə Azərbaycan Respublikasının Nazirlər Kabineti yanında "İçərişəhər" Dövlət Tarix-Memarlıq Qoruğu İdarəsinin Mənzil-kommunal və təmir xidmətində hüquqşünas vəzifəsində çalışmış, 2012–2013-cü illərdə həmin idarənin hüquq və təşkilati təminat şöbəsinin hüquq ekspertizası sektorunda baş məsləhətçi, 2013–2016-cı illərdə isə həmin sektorun müdiri olmuşdur.[1]
Rəşad İsmayılov 2016–2018-ci illərdə Azərbaycan Respublikasının Prezidenti yanında Mənzil İnşaatı Dövlət Agentliyinin Hüquq və nəzarət şöbəsi müdirinin müavini, daha sonra şöbə müdiri vəzifələrində çalışmışdır. 2018-ci ildən etibarən fəaliyyətini Azərbaycan Respublikasının Dövlət Şəhərsalma və Arxitektura Komitəsində davam etdirmiş, 2019-cu ilədək komitənin aparatının hüquq və daxili nəzarət şöbəsinin müdiri, 2019–2024-cü illərdə isə Dövlət Şəhərsalma və Arxitektura Komitəsi Aparatının rəhbəri vəzifəsində işləmişdir.[1]
Azərbaycan Respublikası Prezidentinin 15 avqust 2024-cü il tarixli Sərəncamı ilə ekologiya və təbii sərvətlər nazirinin birinci müavini təyin edilmişdir.[2] 5 fevral 2025-ci ildən 10 fevral 2026-cı ilədək nazir səlahiyyətlərini müvəqqəti icra etmişdir.
Azərbaycan Respublikası Prezidentinin 10 fevral 2026-cı il tarixli Sərəncamı ilə Azərbaycan Respublikasının ekologiya və təbii sərvətlər naziri təyin edilmişdir.[3]
- 1 2 3 4 5 "Rəhbərlik | Rəşad İsmayılov". Ekologiya və Təbii Sərvətlər Nazirliyi. İstifadə tarixi: 10 fevral 2026.
- ↑ "R.S.İsmayılovun Azərbaycan Respublikası ekologiya və təbii sərvətlər nazirinin birinci müavini təyin edilməsi haqqında Azərbaycan Respublikası Prezidentinin Sərəncamı". e-qanun.az. 15 avqust 2024. İstifadə tarixi: 10 fevral 2026.
- ↑ "R. S. İsmayılovun Azərbaycan Respublikasının ekologiya və təbii sərvətlər naziri təyin edilməsi haqqında Azərbaycan Respublikası Prezidentinin Sərəncamı". president.az. 10 fevral 2026. İstifadə tarixi: 10 fevral 2026.